Nashik Crop Damage: नाशिकमध्ये अस्मानीचा तीन हजार हेक्टरला फटका

Nashik News: नाशिक जिल्ह्यात ५ ते ७ मे असे सलग तीन दिवस वादळी वाऱ्यासह झालेल्या मॉन्सूनपूर्व पाऊस व गारपिटीमुळे जिल्ह्यात ५२७ गावांमधील १३,८२२ शेतकऱ्यांचे ३,३०७.४५ हेक्टरवरील पिकांचे नुकसान झाले. या पावसाने कांदा, आंबा, डाळिंब व भाजीपाल्याचे सर्वाधिक नुकसान झाल्याचे जिल्हा प्रशासनाच्या प्राथमिक पाहणीतून समोर आले आहे.

सोमवारी (ता. ५) प्रामुख्याने पश्चिम पट्ट्यातील सुरगाणा तालुक्यातील १५ गावांना या पावसाचा फटका बसला. यात १०५ शेतकरी बाधित झाले. मालेगाव तालुक्यात ३ गावांमध्ये २२५ शेतकऱ्यांचे नुकसान झाले. यात मालेगाव तालुक्यात प्रामुख्याने डाळिंबाचे तर सुरगाणा परिसरात आंब्याचे नुकसान आहे.

मंगळवारी (ता. ६) जिल्ह्यात सर्वदूर पावसाने हजेरी लावली. यात जिल्ह्यात ३२५ गावे बाधित आहेत. तर ८,३११ शेतकऱ्यांचे नुकसान आहे. सलग दुसऱ्या दिवशी झालेल्या वादळी वाऱ्यासह पावसामुळे सुरगाणा तालुक्यात १२६ गावांमध्ये ३,७३९ शेतकऱ्यांना फटका बसला. चांदवड, कळवण, सटाणा, निफाड, दिंडोरी, मालेगाव, पेठ, इगतपुरी तालुक्यात नुकसान आहे. यासह सिन्नर, त्र्यंबकेश्वर, नाशिक, नांदगाव तालुक्यात तुलनेने नुकसान कमी आहे.

बुधवारी (ता. ७) पेठ, त्र्यंबकेश्वर तालुक्यात तालुक्यात आंबा पिकांचे मोठे नुकसान आहे. तर पेठ, दिंडोरी, सटाणा तालुक्यात कांद्याचे नुकसान आहे. तर किरकोळ भाजीपाला पिकांचा तडाखा बसला आहे. अवकाळीने सर्वाधिक ९१७ हेक्टरवरील कांदा पिकांचे नुकसान आहे. तर १,७६० हेक्टरवरील आंबा, ३३३ हेक्टरवर आंब्याचे सर्वाधिक नुकसान आहे. १४६ हेक्टरवर डाळिंबाचे नुकसान झाले आहे. यात लाखो रुपयांचे नुकसान आहे.

नुकसान वाढण्याची शक्यता

दोन दिवस विविध भागांत वादळी पावसाने हजेरी लावली. तर काही भागांत जोरदार गारपीट झाली. वादळी वाऱ्यामुळेही नुकसान आहे. या पावसाचा सर्वाधिक फटका हा शेतीपिकांसह घरांना बसला. पावसाने काहीशी उघडीप दिल्यामुळे प्रशासनाने आता बांधावर जाऊन पंचनामे सुरू केले आहेत. त्यामुळे नुकसानीची तीव्रता अधिक वाढण्याची शक्यता आहे.

नुकसानाचे आकडे

तारीख बाधित गावे बाधित शेतकरी नुकसान क्षेत्र (हेक्टर)

५ मे १८ ३३० १५३

६ मे ३२५ ८३११ १७६७.२

७ मे १८४ ५१८१ १३७७.२०

एकूण ५२७ १३८२२ ३३०७.४५