Namo Shetkari Sanman : साताऱ्यात तीन लाख ८९ हजार शेतकरी ‘नमो’ योजनेत पात्र

Satara News : राज्य सरकारने सुरू केलेल्या नमो शेतकरी महासन्मान योजनेत जिल्ह्यातील अल्पभूधारक तीन लाख ८९ शेतकरी पात्र ठरले आहेत. या शेतकऱ्यांचा दिवाळीपूर्वी पहिला हप्ता दोन हजार रुपयांप्रमाणे जमा केला जाणार आहे.

केंद्र सरकारच्या योजनेच्या धर्तीवर राज्य सरकारनेही अल्पभूधारक शेतकऱ्यांसाठी नमो शेतकरी सन्मान योजना जाहीर केली आहे. या योजनेतून लाभार्थी शेतकऱ्यांना वर्षाला सहा हजार रुपये मिळणार आहेत.

केंद्राच्या योजनेचे व राज्यातील योजनेचे मिळून शेतकऱ्यांना १२ हजार रुपये मिळणार आहेत. राज्यात सध्या दुष्काळ परिस्थिती असून, या परिस्थितीला तोंड देण्यासाठी, तसेच शेतकऱ्यांना सणासुदीत आर्थिक मदत देण्यासाठी नमो शेतकरी सन्मान योजनेचा पहिला हफ्ता राज्यातील ८५ लाख ६० हजार शेतकऱ्यांना प्रत्येकी दोन हजार रुपयांप्रमाणे दिला जाणार आहे.

तो २६ ऑक्टोबरला जमा केल्याचे सांगितले जात आहे; पण ज्या शेतकऱ्यांची केवायसी पूर्ण नाही, अशा शेतकऱ्यांना हा पहिला हप्ता मिळालेला नाही. त्यांनी ऑनलाइन तक्रार करायची आहे. त्यामुळे पुढील कार्यवाही तातडीने होणार आहे.