Pune News : जुन्नरसह आंबेगाव, खेड, शिरूर या तालुक्यांमध्ये ऊस तोडणी हंगाम सुरू झाला असून, ऊसतोडीमुळे बिबट्यांचा धोका वाढला आहे. यामुळे ऊस तोडणी करताना परिसराची पाहणी करून आणि बिबट्या उसात नसल्याची खात्री करूनच तोडणी सुरू करण्याचे आवाहन वन विभागाने केले आहे. ऊस तोडणी सुरू होताना, बिबट्यांचा हक्काचा निवारा कमी होणार असल्याने बिबटे सैरभैर होऊन हल्ले वाढण्याचे धोके निर्माण झाले आहेत.
जुन्नर आणि आंबेगावसह शिरूर तालुक्यातील भीमाशंकर, विघ्नहर, घोडगंगा आदी सहकारी आणि इतर खासगी साखर कारखान्यांसाठी जुन्नरचा शेतकऱ्यांचा ऊस जातो. जुन्नर तालुक्यात ९ हजार ८८६ हेक्टर क्षेत्रात उसाचे पीक घेतले जाते. साखर कारखान्यांचा गाळप हंगाम सुरू झाल्याने अनेक ठिकाणी ऊस तोडीला सुरुवात झाली आहे.
जुन्नर तालुक्यातील ऊस शेती म्हणजे बिबट्यांचे सुरक्षित घर म्हणून ओळखले जाते. ऊसतोड सुरू झाल्यामुळे उसाची शेते मोकळी होऊ लागली आहेत. यामुळे बिबट्यांना लपण्याची जागा राहणार नाही. उसाच्या शेतात सुरक्षित असलेली लपण व निवारा कमी झाल्याने बिबटे सैरभैर होऊन मानवी वस्त्यांमध्ये येण्याचा धोका वाढला आहे. यातूनच बिबट्यांकडून मानवी हल्ल्यांचा देखील धोका निर्माण झाला आहे.
ऊसतोडीच्या काळात त्यांचे लपणे संपुष्टात आल्याने बिबट्यांचा मुक्तसंचार मोठ्या प्रमाणात वाढते. तसेच या काळात पशुधनावर हल्ले झाल्याच्या अनेक घटना यापूर्वी घडल्या आहेत. हा अनुभव लक्षात घेऊन वनविभागाने शेतकऱ्यांना व नागरिकांना काळजी घेण्याचे आवाहन केले आहे.
यापूर्वी ऊसतोड सुरू असताना ऊसतोड कामगारांना अनेकवेळा बिबट्यांचे बछडे आणि बिबटे आढळून आले आहेत. या काळात या बछड्यांची आई अधिक आक्रमक झालेली असते. माणिकडोह येथील बिबट निवारा केंद्रातील रेस्क्यू टीमकडून यापूर्वी अनेकदा अनेक बछडे त्यांच्या आईच्या कुशीत नैसर्गिकरित्या सोपवले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
