Solapur News: हातीद (ता. सांगोला) येथील शेतकरी अल्ताफ पापसो मुल्ला यांच्या शेतातील काढणीस आलेले तीन टन डाळिंब चोरट्याने गुरुवारी (ता. १२) पहाटेच्या सुमारास चोरून नेले. मुल्ला यांनी या प्रकरणी सांगोला पोलिसांत फिर्याद दिली आहे.
या बाबत माहिती अशी की, फिर्यादी अल्ताफ मुल्ला यांच्याकडे भगवा वाणाच्या डाळिंबाची एक एकर बाग आहे. त्यांनी ही बाग चांगल्या पद्धतीने जोपासली होती. विशेष म्हणजे त्यातील डाळिंब काढणीला आले होते.
डाळिंबबाग काढणीला आल्याने मुल्ला पती-पत्नी रोज बाग राखायला शेतात जात होते; पण गुरुवारी मुसळधार पाऊस सुरू झाल्याने दोघेही घरी गेले आणि त्याच मध्यरात्री चोरट्यांनी डाव साधला. त्यांच्या या एका एकरात ३०० झाडे आहेत. चोरी करताना चोरट्यांनी काही झाडे पूर्ण मोकळी केली, तर काही झाडांचे थोडे-थोडे डाळिंब काढून नेले आहेत.
यंदा चार टन डाळिंब निघेल, अशी अपेक्षा मुल्ला यांना होती. चोरीच्या दोन-तीन दिवसांपूर्वीच १३० रुपये प्रतिकिलो डाळिंब व्यापाऱ्याने मागितले होते. १५० रुपये भावाने डाळिंब जाईल, अशी आशा मुल्ला यांना होती. त्यामुळे त्यांनी बाग डाळिंब व्यापाऱ्यास दिली नाही. आतापर्यंत कर्ज काढून त्यांनी ही बाग जोपासली होती.
संपूर्ण कुटुंब या शेतीवरच अवलंबून आहे. बागेतील उत्पन्नावर मुलांच्या शिक्षणाचा खर्च आणि अन्य कामे अवलंबून होती. पण आता बागेतील डाळिंब चोरीला गेल्याने त्यांचे आर्थिक नुकसान झाले आहे. चालू भावानुसार सुमारे साडेतीन लाख रुपयांचे डाळिंब चोरीला गेल्याचे मुल्ला यांचे म्हणणे आहे. या बाबत त्यांनी सांगोला पोलिसांकडे फिर्याद दिली आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.