Roha News : रोहा तालुक्यातील निडीतर्फे अष्टमी गावासाठी जलजीवन योजनेच्या माध्यमातून पाणी योजना मंजूर झाली आहे. घरोघरी नळजोडणीचे काम सुरू करण्याचे आदेशही ऑक्टोबर २०२३ मध्ये देण्यात आले आहेत. परंतु अद्याप कामाला सुरुवातही न झाल्याने निडीतर्फे अष्टमी ग्रामस्थांनी व महिलांनी पंचायत समितीच्या कार्यालयावर बुधवारी धडक देत हल्लाबोल केला व गटविकास अधिकारी शुभदा पाटील यांच्यासमोर पाणीसमस्‍या मांडली.
तालुक्यातील डोंगर-दुर्गम भागातील अनेक गावे अद्याप पिण्याच्या पाण्यापासून वंचित आहेत. हंडाभर पाण्यासाठी महिलांना कैक मैल पायपीट करावी लागते. असे असताना निडी गावासाठी मंजूर झालेल्‍या पाणी योजनेच्या कामाचा अद्याप मुहूर्त न मिळाल्‍याने ग्रामस्थांमधून संताप व्यक्‍त होत आहे.
पहिल्या टप्प्यात जलजीवनच्या माध्यमातून योजना मंजूर झाली असून समाविष्ट कामे पूर्ण झाल्याने ठेकेदाराला बिलही दिली आहेत. मूळ योजनेत विहीर, पंप हाऊस व नवीन पंपाचा समावेश होता. १५ वा वित्त आयोगाच्या निधीतून २०२०-२१ मध्ये अंतर्गत नळजोडणीसाठी एक लाख ९७ हजार रुपये,
जलवाहिनी दुरुस्तीसाठी एक लाख २० हजार, टाकी दुरुस्तीसाठी ९० हजार व पंप दुरुस्तीसाठी ४० हजारांची तरतूद केली आहे. कामे लवकर पूर्ण व्हावीत, यासाठी ग्रामस्थांनी पाठपुरावा करून अंदाजपत्रकेही ग्रामपंचायत कार्यालयात नेऊन दिली. तरी अधिकारी, सरपंच चालढकल करत असल्याने संतप्त ग्रामस्थांनी पंचायत समिती कार्यालयात धडक आपली व्यथा मांडली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.