Vadaj Irrigation Scheme : वडज सिंचन योजनेला मिळेना मुहूर्त

Junnar News : मंजुरी आणि निधी मिळूनही वडज उपसा सिंचन योजनेला मुहूर्त मिळत नसल्याने मीना खोऱ्यातील शेतकरी हवालदिल झाला आहे.यामुळे प्रत्यक्ष निविदा काढून आचारसंहिते पूर्वी योजनेचे काम सुरू व्हावे, अशी शेतकऱ्यांची तीव्र मागणी आहे.

याबाबत आचार संहिता तोंडावर आली असताना प्रकल्प कार्यालयातून मात्र काहीच हालचाली होताना दिसत नाही. गेली अनेक वर्ष हा प्रकल्प काही ना काही कारणांनी रेंगाळत आहे.यामुळे प्रश्न तसाच राहतो की काय, अशी भीती शेतकरी व्यक्त करत आहेत.

मीना खोऱ्यातील वडज उपसा सिंचन योजनेसाठी शासनाने ३५ कोटी ५० रुपयांचा निधी मंजूर करत प्रकल्पाला मान्यता दिली असल्याचे  वृत्त प्रसिद्ध झाल्यानंतर शेतकरी वर्गाच्या आशा पल्लवित झाल्या होत्या. योजनेच्या अनेकदा फक्त घोषणाच झाल्या प्रत्यक्षात काहीच कार्यवाही झाली नाही असे शेतकऱ्यांचे म्हणणे आहे.

वडज उपसा सिंचन योजनेचा सावरगाव, खिलारवाडी, निमदरी, धोंडकरवाडी, एकनाथवाडी, काचळवाडी, पाबळवाडी, निळोबारायनगर तसेच वाड्या वस्त्यांना लाभ होणार आहे. शेतकरी या मागणीसाठी १९९१  पासून आंदोलन करत आहेत. ३० जुलै २४ रोजी मोठ्या संख्येने शेतकऱ्यांनी पावसात तहसीलसमोर उपोषण केले होते.