Humani Pest Issue : तुरीच्या पिकाचे हुमणीमुळे नुकसान

Nagar News : नगर जिल्ह्यासह राज्यातील काही भागांत तूर पिकात हुमणीचा प्रादुर्भाव झाला आहे. त्यामुळे झाडे जागेवर वाळू लागली आहेत. पुढील काळात प्रादुर्भाव वाढल्यास मोठ्या नुकसानीला सामोरे जावे लागण्याची शेतकऱ्यांना भीती वाटत आहे.

राज्यात तुरीचे सरासरी १२ लाख ९५ हजार ५१६ सरासरी हेक्टर क्षेत्र असून, यंदा १२ लाख २३ हजार २१ हेक्टर क्षेत्रावर पेरणी झालेली आहे. गेल्या वर्षी ११ लाख ८ हजार ११५ हेक्टर क्षेत्रावर पेरणी झाली होती. यंदाच्या पावसाच्या चांगल्या स्थितीमुळे गत वर्षीपेक्षा १ लाख १४ हजार हेक्टर क्षेत्र तुरीचे वाढले आहे. नगरसह नंदुरबार, जळगाव, सोलापूर, छत्रपती संभाजीनगर, जालना, बीड, लातूर, धाराशिव, नांदेड, परभणी, हिंगोली, बुलडाणा, अकोला, वाशीम, अमरावती, यवतमाळ, वर्धा, नागपूर, चंद्रपूर जिल्ह्यांत तुरीचे क्षेत्र बऱ्यापैकी आहे.

या वर्षी तूर पिकांची स्थिती चांगली असताना अलीकडच्या आठ दिवसांपासून नगर जिल्ह्यातील श्रीगोंदा, कर्जत, जामखेडसह शेजारच्या बीड जिल्ह्यांतही काही ठिकाणी तुरीला हुमणीचा फटका बसत असल्याचे दिसून येत आहे. हुमणीचा प्रादुर्भाव झालेल्या भागातील झाडे जागेवर सुकून जात आहेत. असे झाड उपटून पाहिल्यानंतर मातीत असलेली हुमणी दिसून येते.

खास करून शेणखताचा वापर केलेल्या ठिकाणी प्रादुर्भाव इतर ठिकाणच्या तुलनेत अधिक आहे. तुरीला हुमणीच्या प्रादुर्भावाची तीव्रता अद्याप फारशी नाही. तुरीची सध्या जोमात वाढ होत असून फुले लागायला सुरुवात झाली आहे. मात्र वेळीच नियंत्रण केले नाही तर प्रादुर्भावात वाढ होऊन तुरीचे नुकसान वाढू शकते अशी भीती शेतकऱ्यांना आहे. यंदा तुरीचे पीक जोमात असताना हे नवे संकट उभे राहते की काय याची चिंता लागली आहे.