Flower Market : शेवंती, झेंडूचा भाव वधारला

Panvel News : गणेशोत्सवापाठोपाठ आता नवरात्र, दसरा व अन्य पूजाविधींसाठी, तसेच सजावटीसाठी फुलांची मागणी वाढते, मात्र यंदा झेंडूसह इतर फुलांच्या किमतीत गेल्या वर्षीच्या तुलनेत १० ते २० रुपयांनी वाढ झाली आहे. गुलाब, शेवंती, मोगरा यंदा चांगलाच भाव खात आहेत. नवरात्रोत्सवात फुलांची मागणी आणखी वाढणार असल्याने भावदेखील वाढण्याची शक्यता विक्रेत्यांनी व्यक्त केली.

नवरात्रीतील १० दिवसांसह दसऱ्याला झेंडूच्या फुलांचे महत्त्व अधिक असते. पूजेबरोबरच घराला तोरण हे झेंडूच्या फुलांचेच असते. वाहनांनाही झेंडूच्या फुलांचे हार घातले जातात. या नऊ दिवसांमध्ये अनेक शुभ कामांचे मुहूर्त साधले जातात. त्यामुळे फुलांची मागणी वाढते. याच पार्श्‍वभूमीवर झेंडू उत्पादक शेतकरी हे दसऱ्याच्या तोंडावर फुले येतील, असे नियोजन करत असतात.

याच काळात मात्र ठिकठिकाणी अतिवृष्टीदेखील झाली आहे. परतीच्या पावसामुळे पिकाचे मोठे नुकसान झाले आहे. अशातच दसऱ्याला लागणारी झेंडूची फुलेही बाजारात भाव खाण्याची शक्यता आहे. घटस्थापनेच्या आधी झेंडू ३० ते ४० रुपये किलोने विकला जात असला, तरी नवरात्रीत याच झेंडूला दुप्पट भाव शेतकऱ्यांना मिळणार आहे. बाजारात याची किंमत २०० रुपये किलो झाली आहे. साहजिकच दसऱ्याच्या दिवशी झेंडूची फुलेही शंभरी पार करतील, असा अंदाज आहे.

शेवंती, अष्‍टर १२० रुपये प्रतिकिलो

फूल बाजारात शेवंती, अष्‍टर सध्या १०० ते १२० रुपये किलो भावाने उपलब्ध आहे. शहरात सध्या मावळ, पुणे, नाशिक, पश्‍चिम महाराष्ट्रातून फुलांची आवक होत आहे. सण, उत्सवांमुळे फुलांची मागणी वाढल्यामुळे यंदाच्या किमतीमध्ये सात ते दहा टक्के वाढ झाली आहे, असे विक्रेत्यांचे म्हणणे आहे. सण-उत्सवांच्या निमित्ताने फुलांच्या किमती वाढल्यामुळे सर्वसामान्यांना जरा विचार करूनच सजावट करावी लागणार असल्याचे ग्राहक सांगतात.

बाजारातील फुलांचे भाव

फुलांचे प्रकार भाव (प्रतिकिलो रु.)

१. मोगरा ६००

२. अबोली ४८०

३. शेवंती ४००

४. गुलाब ४००

५. लिली ४००

६. गुलछडी ३२०

७. कणेर २४०

८. अष्टर २००

९. गुलाब पाकळी १२०

१०. कमळ १५० (डझन)

फुलांचे हार भाव (रु.)

१. मोठा हार १०००

२. मध्यम हार ४००

३. तोरण ८० रु. मीटर