Lumpy Skin Disease: अहिल्यानगर जिल्ह्यात ‘लम्पी’चा प्रादुर्भाव कायम

Ahilyanagar News: अहिल्यानगर जिल्ह्यात गेल्या काही दिवसांपासून जनावरांना ‘लम्पी स्कीन’ची बाधा वाढत आहे. आतापर्यंत ८१० जनावरांना प्रादुर्भाव झाला असून, त्यापैकी ४४४ जनावरे उपचारातून बरी झाली आहेत. आतापर्यंत ३० जनावरांचा मृत्यू झाला आहे. सध्या ३३६ जनावरांवर उपचार सुरू असून, पशुसंवर्धन विभागाने १७२ प्रतिबंधित केंद्रे जाहीर केली आहेत. संबंधित गावांच्या परिसरातील पाच किलोमीटर परिसरात दक्षता घेण्याच्या सूचना केल्या आहेत.

अहिल्यानगर जिल्ह्यात पशुधनांची संख्या अधिक असून, गायवर्गीय जनावरांची संख्या जवळपास १४ लाखांवर आहे. सुरुवातीला जनावरांना लम्पीचा फारसा प्रादुर्भाव नव्हता, मात्र अलीकडच्या काही दिवसांपासून लम्पीचा प्रादुर्भाव वाढला. आतापर्यंत जिल्‍ह्यात ८१० जनावरे बाधित झाली आहेत. त्यात राहाता तालुक्यात १९१, कोपरगावला ८९, कर्जतला ८७, जामखेडला पाच, अकोल्याला ८, अहिल्यानगरला २, पारनेरला २९,

राहुरीला ५७, संगमनेरला १११, शेवगावला ३३, श्रीगोंदा येथे १७, नेवाशात १५७, कोपरगावला ८९, व श्रीरामपूरला १७ जनावरे बाधित झाली. त्यातील ३० जनावरांचा मृत्यू झाला असून, त्यात राहात्याला १५, नेवासा, संगमनेर, कोपरगाव येथे प्रत्येकी चार, राहुरीला १, शेवगावला दोन जनावरे दगावली आहेत.

४४४ जनावरे आजारातून बरी झाली आहेत. सध्या ३३६ जनावरांवर उपचार सुरू आहेत. १७२ गावांत ही बाधित जनावरे आढळली. त्या गावांसह परिसरातील पाच किलोमीटर अंतरावर नियंत्रित क्षेत्र केले आहे. शेतकऱ्यांनी जनावरांच्या गोठ्यात फवारणी करून गोचिड निर्मूलन करण्यासाठी दवाखान्यात औषधे उपलब्ध आहेत. शेतकऱ्यांनी घाबरून न जाता नजीकच्या दवाखान्यात बाधित जनावरांना उपचार करून घ्यावेत, असे आवाहन पशुसंवर्धन विभागाने केले आहे.

वासरांची संख्या बऱ्यापैकी

लम्पी आजाराने बाधित होणाऱ्या जनावरांत वासरांची संख्या अधिक आहे. आतापर्यंत अहिल्यानगर जिल्ह्यात बाधित ८१० जनावरांमध्ये वासरांची संख्या ३४० एवढी आहे. त्यातील १७६ वासरे आजारातून बरी झाली आहेत. या आजारातून जनावरे आणि त्यासोबत वासरे बरी होण्याचे प्रमाण चांगले असले तरी बाधितांत वासरे अधिक असल्याचे अहवालावरून दिसून येत आहे.