Water Level : कोरड्या प्रकल्पाच्या संख्येने शंभरी ओलांडली

Chhatrapati Sambhajinagar : लोकसभा निवडणुकीचा बिगूल वाजला असतानाच मराठवाड्यातील जल संकट ही भीषणतेच्या दिशेने वाटचाल करते आहे. मराठवाड्यातील कोरड्या पडलेल्या प्रकल्पांच्या संख्येने शंभरी ओलांडली आहे. कोरड्या पडलेल्या प्रकल्पांमध्ये १०० लघु तर ४ मध्यम प्रकल्पांचा समावेश आहे. शिवाय २९३ लघु, मध्यम प्रकल्पातील पाणीसाठा जोत्याखाली गेला आहे.

उन्हाळ्याची आणखी चार महिने जाणे बाकी असतानाच मराठवाड्यातील बहुसंख्य पाणी साठ्यांची वाटचाल तळाच्या दिशेने सुरू आहे. संपूर्ण ८७७ लघु, मध्यम, मोठ्या प्रकल्पांसह विविध नद्यांवरील बंधाऱ्यांमध्ये केवळ २५ टक्के उपयुक्त पाणी शिल्लक आहे. त्यातही लघु, मध्यम प्रकल्पाची अवस्था बिकट आहे.

७५ मध्यम प्रकल्पात तसेच ७४९ लघु प्रकल्पात सरासरी १३ टक्केच उपयुक्त पाणीसाठा शिल्लक आहे. ११ मोठा प्रकल्पात ३० टक्के, गोदावरी नदीवरील १५ बंधाऱ्यात २७ टक्के तर तेरणा, मांजरा, रेणा नदीवरील २७ बंधाऱ्यांमध्ये केवळ १८ टक्के उपयुक्त पाणी शिल्लक आहे. मराठवाड्यातील २४ मध्यम व २७९ लघु प्रकल्पातील पाणीसाठा जोत्याखाली गेला आहे.

जोत्याखाली पाणीसाठा गेलेल्या लघु प्रकल्पांमध्ये धाराशिवमधील ९३, लातूरमधील ५५, बीडमधील ४८, छत्रपती संभाजीनगरमधील ३१, जालन्यातील १५, परभणीतील १६, हिंगोलीतील ५, नांदेडमधील ६ लघु प्रकल्पांचा समावेश आहे. दुसरीकडे जोत्याखाली पाणीसाठा गेलेल्या २४ मध्यम प्रकल्पांमध्ये धाराशिवमधील १०, जालना व लातूरमधील प्रत्येकी ३, नांदेड व छत्रपती संभाजीनगरमधील प्रत्येकी १ तसेच बीड मधील ६ मध्यम प्रकल्पांचा समावेश असल्याची माहिती जलसंपदा विभागाकडून देण्यात आली.

सीनाकोळेगाव, माजलगाव मृतसाठ्यात

मोठ्या प्रकल्पांपैकी जायकवाडी प्रकल्पात २४ टक्के उपयुक्त पाणीसाठा शिल्लक असून माजलगाव व सीना कोळेगाव प्रकल्प मृतसाठ्यात आहेत. मांजरा प्रकल्पात १० टक्के, निम्न तेरणामध्ये ६ टक्के, निम्न दुधनामध्येही १० टक्के, निम्न मनारमध्ये ३४ टक्के, विष्णुपुरीत ४८ टक्के, उर्ध्व पैनगंगा मध्ये ५७ टक्के तर सिद्धेश्वर मध्ये ५७ टक्के व येलदरी प्रकल्पात ४१ टक्के उपयुक्त पाणीसाठा शिल्लक आहे.