Kolhapur News : कूर दूधगंगा उजव्या कालव्याच्या १७ कि.मी. अस्तरीकरण कामास २४ कोटी रुपयांचा निधी विशेष बाब म्हणून उपलब्ध झाल्यामुळे मुदाळ ते मिणचे खुर्द या परिसरातील दहा गावांमधील शेतकऱ्यांच्या जीवनात नंदनवन फुलणार आहे व शेतीचे अर्थकारण समृद्ध होणार असल्याचे प्रतिपादन आमदार प्रकाश आबिटकर यांनी केले.
निळपण (ता. भुदरगड) येथे मुदाळ ते मिणचे कालव्याच्या अस्तरीकरण कामाच्या प्रारंभप्रसंगी ते बोलत होते. या वेळी दहा गावांतील शेतकऱ्यांनी निधी उपलब्ध केल्याबद्दल आमदार आबिटकर यांचा सत्कार केला.
आमदार आबिटकर म्हणाले, ‘‘अस्तरीकरणाअभावी गेली अनेक वर्षे शेती नापीक होऊन शेतकऱ्यांना आर्थिक भुर्दंड सहन करावा लागत होता; पण आता अस्तरीकरणामुळे पाणी उपलब्ध होणार आहे. या निमित्ताने शेतकऱ्यांच्या जीवनात हरितक्रांती फुलेल.’’
बाजार समितीचे माजी संचालक कल्याणराव निकम म्हणाले, ‘‘गेली अनेक वर्षे अस्तरीकरण नसल्यामुळे पाणी वाया जात होते. त्यामुळे शेतकऱ्यांत वाद होत होते. आता या कामामुळे शेतकऱ्यांना मुबलक पाणी उपलब्ध होणार आहे.’’
विक्रमसिंह पाटील यांनी स्वागत केले. या वेळी बी. एस. देसाई, ‘गोकुळ’चे संचालक नंदकुमार ढेंगे, कल्याणराव निकम, अजित देसाई, कार्यकारी अभियंता ए. एस. पोवार, अशोक भांदिगरे, सुरेश देसाई, प्रवीण नलवडे, वसंत प्रभावळे, संदीप पाटील, शहाजी ढेरे, धनाजी पाटील, उल्हास अगस, सरपंच वैशाली पाटील आदी उपस्थित होते. अक्का नलवडे यांनी आभार मानले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.