Drought Crisis : उन्हाच्या तीव्र झळांनी केळी बागा होरपळल्या

Parbhani News : जिल्ह्यातील दुष्काळी स्थितीमुळे सिंचनासाठी पाणी नाही. त्यात मागील महिनाभरापासून तापमानात वाढ झाली आहे. उन्हाचा चटका वाढला आहे. परिणामी, जिल्ह्यातील केळी बागा होरपळून जात आहेत. शेतकऱ्यांचे मोठे आर्थिक नुकसान झाले आहे.

परभणी जिल्ह्यात सरासरीच्या तुलनेत ३२ टक्के पावसाची तूट आहे. त्यामुळे दुष्काळी स्थिती उद्भवली आहे. पिण्यासह सिंचनासाठी पाण्याचे दुर्भिक्ष आहे. जायकवाडी डाव्या कालव्याच्या लाभक्षेत्रातील पाथरी, मानवत, परभणी, पूर्णा तालुक्यांतील गावांत सिंचनासाठी पाण्याची उपलब्धता असते.

पुरेसे पाणी असलेले शेतकरी केळीची लागवड करतात. परंतु जायकवाडी धरण भरले नाही. त्यामुळे कालव्याद्वारे उन्हाळी हंगामातील आवर्तने मिळाली नाहीत. विहिरी, बोअर आदी सिंचन स्त्रोतांना पाणी नाही.

मार्चपासून तापमान ४० अंश सेल्सिअसच्या दरम्यान आहे. उन्हाचा चटका वाढला आहे. त्यामुळे जमिनीतील ओलावा नष्ट झाला आहे. केळी पिकाला पाण्याची गरज वाढली आहे. परंतु सिंचनासाठी पाणी नसल्यामुळे घडे लागलेल्या अवस्थेतील केळीच्या बागा होरपळून गेल्या आहेत.