Onion Seed : कांदा बियाण्यांसाठी पुन्हा शोधाशोध सुरू

Nashik News : सध्या कांद्याला चांगला भाव असल्याने शेतकऱ्यांचे लक्ष कांद्यावर केंद्रित आहे. मात्र मुसळधार पावसामुळे कांद्याच्या पिकासह कांद्याची रोपे खराब होऊ लागली आहेत. अधिकच्या पावसामुळे बहुतांश शेतकऱ्यांनी टाकलेले बियाणे (उळे) खराब झाल्याने नवीन उळे टाकावे लागत आहे. मात्र आता बियाण्यांची टंचाई झाल्याने बियाण्यांच्या दरात वाढ झाली आहे. यामुळे ‘कुणी उळे देता का उळे’ असे म्हणण्याची वेळ आली आहे.

कसमादे परिसरात पावसाने चांगली हजेरी लावल्याने येथील शेतकऱ्यांनी कांदा लागवडीवर लक्ष केंद्रित केले आहे. पावसाळी खरीप लाल कांद्याची लागवड करण्यास उशीर झाला असला तरी कांद्याचे वाढते भाव पाहून कांदा लागवडीची लगबग दिसून येत आहे. ज्यांच्याकडे कांद्याची रोपे आहेत त्यांची लागवड सुरू असली तरी ज्यांची रोपे खराब झाली आणि ज्यांच्याकडे रोपे नाहीत त्यांना मात्र कांद्याची रोपे शोधावी लागत आहेत.

याशिवाय बहुतांश शेतकऱ्यांनी उन्हाळ कांदा लागवड लवकर करण्याच्या उद्देशाने उन्हाळी रब्बी कांदा बियाणे टाकत रोप तयार करण्यात आघाडी घेण्याचा प्रयत्न केला. तरी अतिपावसामुळे तो अयशस्वी ठरला आहे. कारण अनेक शेतकऱ्यांचे उन्हाळ कांद्याचे रोप खराब झाले आहे. मर व बुरशी यांचा प्रादुर्भाव व दव पडून कांद्याची रोपे खराब झाली आहेत.

मागील वर्षी या भागात दुष्काळजन्य परिस्थिती असल्याने शेतकऱ्यांना कांदा डोंगळे लावता न आल्याने कांदा बियाण्यांचे (काळे उळे) उत्पादन घेण्यास मर्यादा अल्या. घरात बियाणे नसल्याने कांद्याचे बियाणे विकत घ्यावे लागले. एक महिन्यापूर्वी दोन हजार रुपये किलो मिळणाऱ्या बियाण्यांचे दर आता जवळपास दोन हजार आठशे ते तीन हजार रुपये किलोपर्यंत वाढले आहेत.

यामुळे कांद्याचे रोप तयार करण्यासाठी पुन्हा बियाणे विकत घेणे आता शेतकऱ्यांना परवडणारे नसले तरी कर्ज वा उसनवार करून बियाणे घेतल्याशिवाय पर्याय नसल्याने महागाचे बियाणे विकत घेण्याची वेळ आली आहे. पाऊस पडल्यामुळे आता कांदा लागवड करायची तयारी असली तरी रोपांची आणि बियाण्याची उपलब्धता नसल्याने शेतकरी कांदा रोपाच्या व बियाण्यांच्या शोधात फिरत आहेत.