India Pakistan Conflict: भारत-पाकिस्तानातील संघर्ष अखेर थांबला

New Delhi News: भारत आणि पाकिस्तान यांच्यातील संघर्ष अखेर थांबला आहे. पाकिस्तानच्या विनंतीनंतर भारताने शस्त्रसंधीचा निर्णय घेतलेला आहे. या वृत्ताला पाकिस्तानचे उपपंतप्रधान इशाक डार यांनी दुजोरा दिला आहे. भारतासोबत शस्त्रसंधी झाल्याची माहिती डार यांनी दिली आहे. शनिवारी (ता. १०) सायंकाळी ५ वाजल्यापासून शस्त्रसंधी झालेली आहे.

भारत आणि पाकिस्तानचे लष्करी अधिकारी १२ मे रोजी बैठक घेणार आहेत. दोन्ही देशांनी थेट चर्चा केल्यानंतर हा निर्णय घेण्यात आल्याचे भारताकडून सांगण्यात आलेले आहे. पाकिस्तानच्या विनंतीवरून सैनिकी कारवाई थांबवल्याचे भारत सरकारकडून सांगण्यात आले आहे.

परराष्ट्र सचिव विक्रम मिस्री यांनी सांगितले, की जमीन, आकाश आणि समुद्राद्वारे होणाऱ्या सर्व कारवाया थांबविण्यात आल्या आहेत. पाकिस्तानच्या लष्करी ऑपरेशन्सचे महासंचालक यांनी भारतीय अधिकाऱ्यांशी संपर्क साधून शस्त्रसंधीची मागणी केली. भारताने आपल्या अटींवर शस्त्रसंधीस परवानगी दिली आहे. शनिवारी (ता.१०) सायंकाळी ५ वाजल्यापासून शस्त्रसंधीची घोषणा करण्यात आली आहे.

पाकिस्तानच्या लष्करी अधिकाऱ्यांनी भारताच्या डीजीएमआय यांच्याशी शनिवारी दुपारी साडेतीन वाजता फोनवरून चर्चा केली. दोघांमध्ये दोन्ही बाजूंकडील गोळीबार, जमिनी कारवाई तसेच हवाई आणि समुद्री कारवाई भारतीय वेळेनुसार शनिवारी संध्याकाळी ५ वाजल्यापासून थांबवण्याबाबत एकवाक्यता झाली. याबाबतच्या सूचना दोन्ही बाजूंना देण्यात आल्या आहेत. १२ मे रोजी १२ वाजता दोन्ही देशांचे डीजीएमओ चर्चा करतील, अशी माहिती भारताचे परराष्ट्र सचिव विक्रम मिस्री यांनी मंत्रालयाकडून शस्त्रसंधीची घोषणा केल्यानंतर शनिवारी सायंकाळी ५ वाजल्यापासून दोन्ही बाजूंनी कारवाया थांबल्या.

डोनाल्ड ट्रम्प यांची ‘एक्स’ पोस्ट

अमेरिकेचे राष्ट्राध्यक्ष अमेरिकेचे राष्ट्राध्यक्ष डोनाल्ड ट्रम्प यांनी शनिवारी (ता. १०) भारत आणि पाकिस्तान शस्त्रविरामासाठी तयार झाल्याची घोषणा केली. त्यांनी या संदर्भात ‘एक्स’वर पोस्ट टाकून भारत आणि पाकिस्तानदरम्यान मध्यस्थी घडवून आणण्यासाठी अमेरिकेने प्रयत्न केल्याचा दावा केला.