Leopard Terror : पानगावात बिबट्यासदृश प्राणी दिसल्याने खळबळ

Solapur News : पानगाव (ता. बार्शी) परिसरात रविवारी (ता. १५) सकाळी बिबट्यासदृश प्राणी दिसल्याचे एका शेतकऱ्याने गावात सांगितले. त्यामुळे एकच खळबळ उडाली आहे. या घटनेमुळे बार्शी येथील वनविभाग ॲलर्ट मोडवर आला असून, घटनास्थळी त्यांनी भेट दिली आहे.

पानगाव येथील शेतकरी अमोल जाधव यांनी सांगितलेल्या माहितीनुसार, पानगावच्या पश्चिमेकडील पानगाव- कोरफळे रस्त्यापासून जवळच असलेल्या पालखा परिसरात सकाळी सहाच्या दरम्यान एक बिबट्यासदृश प्राणी पाणवठ्याजवळ दिसला.

हा प्राणी दिसताच आरडाओरड केल्याने तो तिथून निघून गेल्याचे जाधव यांनी सांगितले. त्या परिसरात तूर पीक उंच असल्याने तिथून तो प्राणी पुढे कुणीकडे गेला याची माहिती मिळाली नाही. दरम्यान, प्रत्यक्षदर्शी जाधव यांच्या म्हणण्यानुसार, या प्राण्यास त्यांनी जवळून पाहिले आहे.

घटनेची माहिती मिळताच वनविभाग बार्शी येथील टीम तेथे तत्काळ दाखल झाली. त्याचबरोबर आसपास त्या प्राण्याचा शोध घेतला, पण तो आढळून आला नाही. वनविभागाने परिसरात पायाच्या ठशांची काही छायाचित्रेही घेतली आहेत.

 वनविभागाचे आवाहन

दरम्यान, परिसरातील पानगाव, कळंबवाडी (पा), पिंपळगाव (पा) आदी गावांत ही चर्चा असली तरी बिबट्या असल्याचा प्रत्यक्ष पुरावा अथवा छायाचित्र मिळत नसल्याने संभ्रमावस्था कायम आहे.

त्यामुळे नागरिकांनी शेतात जाताना शक्यतो समूहाने जावे. तसेच हातात काठी घेऊन जावे. रात्री पिकांस पाणी देताना एकाऐवजी दोघांनी सोबत जावे, संशयास्पद हालचाल वाटल्यास फोन करणे अथवा मोठा आवाज करून इतरांना माहिती द्यावी, असे आवाहन वनविभागाच्या वतीने करण्यात आले आहे.