डॉ. रामचंद्र साबळे
Weather News : महाराष्ट्रावर आजपासून शनिवार (ता. २ ते ८) पर्यंत हवेचे दाब १०१० हेप्टापास्कल इतक्या मध्यम स्वरूपाचे राहतील. या आठवड्यातील काही दिवस विदर्भ आणि पश्चिम महाराष्ट्रात आकाश अंशतः ढगाळ राहण्याची शक्यता आहे. किमान तापमानात २ अंश सेल्सिअसने वाढ होण्याची आहे. त्याचा परिणाम थेट थंडीचे प्रमाण व तीव्रता कमी होण्यावर दिसून येईल. वाऱ्याची दिशा दक्षिण- पश्चिम महाराष्ट्रात ईशान्य, आग्नेय व वायव्येकडून राहण्यामुळे काही जिल्ह्यात थंडीचे प्रमाण कमी जास्त होईल. वाऱ्याचा ताशी वेग साधारणच राहील.
सकाळी हवामान थंड व कोरडे राहील. तर दुपारी उन्हाची तीव्रता जाणवेल. त्यामुळे पिकांची पाण्याची गरज वाढेल. सकाळी सापेक्ष आर्द्रतेचे प्रमाण चांगले राहील. मात्र दुपारच्या सापेक्ष आर्द्रतेत घट होईल. पश्चिम महाराष्ट्रातील कोल्हापूर, सांगली, सातारा व पुणे जिल्ह्यांत आज हवामान ढगाळ राहील.
सध्याचे हवामान गहू, हरभरा, मोहरी, सूर्यफूल या पिकांसाठी उपयुक्त राहील. तसेच उसात साखर निर्मितीसही हवामान अनुकूल राहील. या आठवड्यात ढगाळ हवामानामुळे पिकांवर कीड व रोगांचा प्रादुर्भाव वाढण्याची शक्यता आहे. सूर्याचे उत्तरायण सुरू असल्याने हळूवारपणे दिवसाचा कालावधी वाढत जाईल.
प्रशांत महासागराच्या विषुववृत्तीय भागात पाण्याच्या पृष्ठभागाचे तापमान वाढेल. इक्वॅडोरजवळ पाण्याच्या पृष्ठभागाचे तापमान २७ अंश सेल्सिअसपर्यंत, तर पेरूजवळ १९ अंश सेल्सिअसपर्यंत वाढलेले असल्याने या वर्षी ‘एल निनो’ अथवा ‘ला-निना’चा प्रभाव राहणार नाही. हिंदी महासागराच्या पाण्याच्या पृष्ठभागाचे तापमान २९ ते ३० अंश सेल्सिअस असून, काही प्रमाणात ते ढग निर्मितीसाठी अनुकूल आहे.
कोकण ः
कमाल तापमान रायगड व ठाणे जिल्ह्यांत ३२ अंश सेल्सिअस, तर सिंधुदुर्ग, रत्नागिरी व पालघर जिल्ह्यांत ३३ अंश सेल्सिअस राहील. किमान तापमान रत्नागिरी जिल्ह्यात १८ अंश सेल्सिअस, तर सिंधुदुर्ग, ठाणे व पालघर जिल्ह्यांत २० अंश सेल्सिअस आणि रायगड जिल्ह्यात २१ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सकाळची सापेक्ष आर्द्रता सिंधुदुर्ग व रत्नागिरी जिल्ह्यांत ६६ ते ६८ टक्के, तर रायगड जिल्ह्यात ६४ टक्के राहील. सकाळची सापेक्ष आर्द्रता ठाणे व पालघर जिल्ह्यांत ४८ ते ५० टक्के राहील. सिंधुदुर्ग व रत्नागिरी जिल्ह्यांत दुपारची सापेक्ष आर्द्रता ६० ते ६१ टक्के, तर रायगड जिल्ह्यात ५२ टक्के राहील. मात्र ठाणे व पालघर जिल्ह्यांत दुपारची सापेक्ष आर्द्रता ४२ ते ४५ टक्के इतकी कमी राहील. सर्वच जिल्ह्यांत वाऱ्याचा ताशी वेग ५ ते ६ कि.मी. राहील. सर्वच जिल्ह्यांत वाऱ्याची दिशा ईशान्येकडून राहील.
उत्तर महाराष्ट्र ः
कमाल तापमान नाशिक व धुळे जिल्ह्यांत ३२ अंश सेल्सिअस, तर नंदुरबार व जळगाव जिल्ह्यांत ३३ अंश सेल्सिअस राहील. किमान तापमान धुळे जिल्ह्यात १२ अंश सेल्सिअस, तर नाशिक, नंदुरबार व जळगाव जिल्ह्यांत १३ अंश सेल्सिअस राहील. सर्वच जिल्ह्यांत आकाश निरभ्र राहील. सकाळची सापेक्ष आर्द्रता नाशिक जिल्ह्यात ६२ टक्के, जळगाव जिल्ह्यात ५८ टक्के, तर नंदुरबार जिल्ह्यात ५४ टक्के आणि धुळे जिल्ह्यात ५० टक्के राहील. दुपारची सापेक्ष आर्द्रता नाशिक व जळगाव जिल्ह्यांत ४५ ते ४७ टक्के, तर नंदुरबार व धुळे जिल्ह्यांत ४१ ते ४३ टक्के राहील. वाऱ्याचा ताशी वेग सर्वच जिल्ह्यांत ४ ते ५ कि.मी. राहील. वाऱ्याची दिशा ईशान्येकडून राहील.
मराठवाडा ः
कमाल तापमान धाराशिव, लातूर, नांदेड व जालना जिल्ह्यांत ३३ अंश सेल्सिअस, तर बीड, परभणी व छत्रपती संभाजीनगर जिल्ह्यांत ३४ अंश सेल्सिअस राहील. यापुढील काळात कमाल तापमानात हळूवारपणे २ अंश सेल्सिअसपर्यंत वाढ होणे अपेक्षित आहे. धाराशिव, बीड व हिंगोली जिल्ह्यांत किमान तापमान १४ अंश सेल्सिअस, तर लातूर, नांदेड, जालना व छत्रपती संभाजीनगर जिल्ह्यांत १५ अंश सेल्सिअस राहील. किमान तापमान परभणी
जिल्ह्यात १६ अंश सेल्सिअस राहील. सर्वच जिल्ह्यांत आकाश काही दिवशी अंशतः ढगाळ राहील. सकाळची सापेक्ष आर्द्रता बीड, जालना व छत्रपती संभाजीनगर जिल्ह्यांत ५३ ते ५५ टक्के, तर हिंगोली, परभणी व नांदेड जिल्ह्यांत ५७ ते ५८ टक्के राहील. धाराशिव व लातूर जिल्ह्यांत सकाळची सापेक्ष आर्द्रता ६२ ते ६८ टक्के राहील. दुपारची सापेक्ष आर्द्रता नांदेड जिल्ह्यात ४२ टक्के, तर बीड, हिंगोली व परभणी व धाराशीव जिल्ह्यांत ४५ ते ४६ टक्के राहील. लातूर व छत्रपती संभाजीनगर जिल्ह्यांत दुपारची सापेक्ष आर्द्रता ४८ टक्के राहील. वाऱ्याचा ताशी वेग सर्वच जिल्ह्यात ५ ते ६ कि.मी. राहील. वाऱ्याची दिशा ईशान्येकडून राहील.
पश्चिम विदर्भ ः
कमाल तापमान बुलडाणा व वाशीम जिल्ह्यांत ३२ अंश सेल्सिअस, तर अकोला व अमरावती जिल्ह्यांत ३३ अंश सेल्सिअस राहील. किमान तापमान बुलडाणा व अकोला जिल्ह्यांत १२ अंश सेल्सिअस, तर वाशीम व अमरावती जिल्ह्यांत १३ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सकाळची सापेक्ष आर्द्रता बुलडाणा व अकोला जिल्ह्यांत ७० टक्के, तर अमरावती व वाशीम जिल्ह्यांत ६४ ते ६६ टक्के राहील. दुपारची सापेक्ष आर्द्रता बुलडाणा जिल्ह्यात ५२ टक्के, तर अकोला जिल्ह्यात ५४ टक्के राहील. वाऱ्याचा ताशी वेग ४ ते ६ कि.मी. राहील. वाऱ्याची दिशा ईशान्येकडून राहील.
मध्य विदर्भ ः
कमाल तापमान वर्धा व नागपूर जिल्ह्यांत ३२ अंश सेल्सिअस, तर यवतमाळ जिल्ह्यात ३३ अंश सेल्सिअस राहील. किमान तापमान यवतमाळ जिल्ह्यात १४ अंश सेल्सिअस, तर वर्धा व नागपूर जिल्ह्यांत १५ अंश सेल्सिअस राहील. सर्वच जिल्ह्यात आकाश अंशतः ढगाळ राहील. सकाळची सापेक्ष आर्द्रता यवतमाळ जिल्ह्यात ६५ टक्के, तर वर्धा व नागपूर जिल्ह्यांत ७० टक्के राहील. दुपारची सापेक्ष आर्द्रता यवतमाळ व वर्धा जिल्ह्यांत ५६ टक्के, तर नागपूर जिल्ह्यात ६० टक्के राहील. वाऱ्याचा वेग सर्वच जिल्ह्यात ताशी ४ ते ५ कि.मी. राहील. वाऱ्याची दिशा सर्वच जिल्ह्यात ईशान्येकडून राहील.
पूर्व विदर्भ ः
कमाल तापमान चंद्रपूर जिल्ह्यात ३२ अंश सेल्सिअस, गडचिरोली व गोंदिया जिल्ह्यांत ३३ अंश सेल्सिअस आणि भंडारा जिल्ह्यात ३४ अंश सेल्सिअस राहील. किमान तापमान भंडारा व गोंदिया जिल्ह्यांत १३ अंश सेल्सिअस, तर गडचिरोली जिल्ह्यात १४ अंश सेल्सिअस राहील. चंद्रपूर जिल्ह्यात किमान तापमान १५ अंश सेल्सिअस राहील. सर्वच जिल्ह्यात आकाश अंशतः ढगाळ राहील. सकाळची सापेक्ष आर्द्रता चंद्रपूर व गडचिरोली जिल्ह्यांत ७० ते ७२ टक्के राहील. मात्र भंडारा व गोंदिया जिल्ह्यांत सकाळची सापेक्ष आर्द्रता ७८ ते ८० टक्के राहील. दुपारची सापेक्ष आर्द्रता चंद्रपूर व गडचिरोली जिल्ह्यात ६० ते ते ६२ टक्के राहील. मात्र भंडारा व गोंदिया जिल्ह्यात दुपारची सापेक्ष आर्द्रता ६४ ते ६५ टक्के राहील. वाऱ्याचा ताशी वेग ४ ते ६ कि.मी. राहील. वाऱ्याची दिशा ईशान्येकडून राहील.
पश्चिम महाराष्ट्र ः
कमाल तापमान कोल्हापूर व सातारा जिल्ह्यांत ३१ अंश सेल्सिअस, तर सांगली व पुणे जिल्ह्यांत ३२ अंश सेल्सिअस राहील. सोलापूर व अहिल्यानगर जिल्ह्यात कमाल तापमान ३३ अंश सेल्सिअस राहील. किमान तापमान सातारा व पुणे व अहिल्यानगर जिल्ह्यांत १२ ते १३ अंश सेल्सिअस, तर कोल्हापूर, सांगली व सोलापूर जिल्ह्यांत १८ अंश सेल्सिअस राहील. आकाश अंशतः ढगाळ राहील. सकाळची सापेक्ष आर्द्रता सांगली जिल्ह्यात ६७ टक्के, सोलापूर व अहिल्यानगर जिल्ह्यांत ७० ते ७२ टक्के, तर सातारा व कोल्हापूर जिल्ह्यांत ७८ टक्के राहील. दुपारची सापेक्ष आर्द्रता सांगली जिल्ह्यात ४३ टक्के, तर सातारा जिल्ह्यात ३० टक्के राहील. कोल्हापूर, सोलापूर, पुणे व अहिल्यानगर जिल्ह्यांत दुपारची सापेक्ष आर्द्रता ३५ ते ३८ टक्के राहील. दुपारी हवामान अत्यंत कोरडे राहील. वाऱ्याचा ताशी वेग ४ ते ५ कि.मी. राहील. वाऱ्याची दिशा सर्वच जिल्ह्यांत ईशान्य, आग्नेय आणि वायव्येकडून राहील.
कृषी सल्ला ः
- उन्हाळी भुईमूग, बाजरी, तीळ या पिकांची पेरणी बागायत क्षेत्रात करावी.
- टरबूज, खरबूज, काकडी, दोडका, घोसाळी लागवड पूर्ण करावी.
- गहू व हरभरा पिकास वाढीचे अवस्थेनुसार पाणी द्यावे.
- पशुधनास लाळ्या खुरकूत आजाराची प्रतिबंधक लस पशुवैद्यकाकडून टोचून घ्यावी.
- उन्हाळी हंगामात चाऱ्यासाठी आफ्रिकन टॉल मक्याच्या पेरणी करावी.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
