Farmer Protest : कापूस-सोयाबीन दरासाठी 'स्वाभिमानी' आक्रमक; सरकारचा केला प्रतीकात्मक दशक्रिया विधी!

Buldhana News : यंदा पावसाने ओढल्याने खरीप हंगामातील पिकांचे उत्पादनात घट झाली. सध्या राज्य सर्वत्र पिकांची काढणी आहे. सणासुदीच्या तोंडावर बाजारात शेतमालाची आवक वाढली असून सोयाबीन आणि कापूस दरामध्ये मोठ्या प्रमाणात घसरण सुरू आहे. अशा परिस्थितीत राज्य सरकार ठोस भूमिका घेत नसल्याने स्वाभिमानी शेतकरी संघटना आक्रमक झाली आहे. खामगाव येथे शेतकऱ्यांनी सरकारच्या धोरणाचा निषेध करून प्रतीकात्मक दशक्रिया विधी केला.

सोयाबीन प्रति क्विंटल ८ हजार रूपये व कापसाला प्रति क्विंटल १२ हजार रूपये भाव देण्यासाठी मागणीसाठी स्वाभिमानी शेतकरी संघटना आग्रही आहे. त्यांच्या आंदोलनास राज्यभरातून पाठिंबा मिळत आहे. अनेक ठिकाणी पदाधिकाऱ्यांनी आंदोलन सुरू केले आहेत. तरी देखील सरकार ठोस भूमिका घेत नसल्याने खामगावामध्ये स्वाभिमानी शेतकरी संघटनेचे जिल्हाध्यक्ष अमोल टिकार-पाटील यांच्या नेतृत्वाखाली मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांच्या फोटोंना हार घालून सरकारचा प्रतिकात्मकरित्या दशक्रिया विधी पार पाडला.

सरकारने हस्तक्षेप करून कापूस व सोयाबीनला चांगले भाव द्यावा, अन्यथा स्वाभिमानी शेतकरी संघटनेच्या वतीने दिवाळीच्या दिवशी राज्य सरकारचा तेरव्या पत्रिका वाटून आंदोलन करण्यात येईल असा इशारा जिल्हाध्यक्ष अमोल टिकार-पाटील देण्यात आला.