Sugarcane Cultivation : सांगली जिल्ह्यात १४ हजार हेक्टरवर उसाची लागवड

Sangli News : जिल्ह्यात गेल्या पंधरा ते वीस दिवसापासून पावसाने उघडीप दिली आहे. त्यामुळे शेतकऱ्यांनी आडसाली हंगामातील ऊस लागवडीचे नियोजन केले आहे. ऊस लागवडीला गती आली असून १४ हजार ६२३ हेक्टरवर उसाची लागवड झाली आहे. शेतकऱ्यांनी ऊस लागवड केलेल्याची माहिती कृषी विभागाकडून घेणे सुरु आहे.

जिल्ह्यात मे महिन्यात मुसळधार पावसाने हजेरी लावली. त्यानंतर आठ दिवस पावसाने उघडीप दिली. त्यातच मेच्या शेवटच्या आठवड्यात पुन्हा पाऊस सुरु झाला. त्यामुळे शेतात पाणी साचून राहिले. त्यामुळे शेतकऱ्यांना ऊस शेतीसाठी पूर्व मशागती करण्यासाठी अडथळे निर्माण झाले.

त्यामुळे काही प्रमाणात ऊस लागवडीला ब्रेक लागला होता. जुलै महिन्यात १८ दिवसात ११७ मिलिमीटर इतका पाऊस झाला. या महिन्यात पावसाने बहुतांश भागात पावसाचा जोर कमी होता. त्यामुळे शेतकऱ्यांनी महिन्यापासून ऊस लागवडीचे नियोजन शेतकऱ्यांनी केले आहे.

दरम्यान, गेल्या वीस दिवसापासून पावसाने उसंत घेतली आहे. सध्या जत, खानापूर, वाळवा, तासगाव, पलूस आणि कडेगाव या तालुक्यातील शेतकऱ्यांनी ऊस लागवडी सुरु केल्या आहेत. पावसाने उघडीप दिली असल्याने शेतकरी ऊस लागवडीसाठी पुढे आला आहे. इतर तालुक्यातही शेतकऱ्यांनी ऊस लागवड केली आहे. परंतु ऊस लागवड केलेल्या क्षेत्राची माहिती संकलित करण्याचे काम तालुका स्तरावर सुरु आहे.

यंदा मे महिन्यापासूनच जून महिन्यापर्यंत सलग पाऊस सुरु होता. जुलै महिन्यातही मध्यापर्यंत संततधार पावसाने हजेरी लावली. अशा परिस्थितीतही शेतकऱ्यांनी ऊस लागवड केली आहे. ऊस पीक उगवण ते फुटवा अवस्थेत आहे. खोड किडीचा अल्प प्रमाणात प्रादुर्भाव आढळून आला आहे. अशी नोंद कृषी विभागाने केली आहे.

तालुकानिहाय आडसाली हंगामातील उसाचे क्षेत्र (हेक्टरमध्ये)

तालुका क्षेत्र

जत ३६७

खानापूर ३६४६

वाळवा ५१३१

तासगाव १८४४

पलूस २६४४

कडेगाव ९८६

एकूण १४६२३