Water Extraction : फुपनगरीत पूररेषेत कूपनलिकांद्वारे बेसुमार पाणीउपसा सुरू

Jalgaon News : फुपनगरी (ता. जळगाव) येथे पूररेषेत किंवा नदी पात्रात कूपनलिका खोदून त्यातून बेसुमार पाणीउपसा सुरू आहे. नियम व संकेत डावलून तयार केलेल्या या कूपनलिकांना वीज संयोजन किंवा वीज जोडणी मिळालीच कशी, असाही प्रश्न उपस्थित केला जात आहे.

पूररेषेसंबंधी प्रशासन, यंत्रणेने नियम, निकष लागू केले आहेत. पूररेषेत बांधकाम, पाणीउपसा यासंबंधी संकेत, अटी आहेत. केंद्र व राज्य शासन यांनी याबाबत मार्गदर्शक सूचनाही केल्या आहेत. ब्लू लाइन अॅक्ट किंवा पूररेषा नियंत्रण कायदादेखील त्यासंबधी आहे.

पर्यावरण विभागाही पूररेषेत अतिक्रमण व अवैध कार्यवाही, पाणी, माती, वाळूउपसा होऊ नये यासाठी आग्रही असतो. परंतु फुपनगरी शिवारात पूररेषेसंबंधीचे नियम, संकेत डावलून कूपनलिका खोदण्याचा सपाटा लावण्यात आला. एकामागोमाग कूपनलिका वर्षागणिक खोदण्यात आल्या व बेसुमार पाणीउपसा त्यातून आजही सुरू आहे.

प्रशासन, वीज कंपनीचे दुर्लक्ष

पूररेषेचे नियम व अन्य संकेत डावलून कूपनलिका खोदण्याचा सपाटा सुरू असताना महसूल प्रशासन व अन्य यंत्रणांनी कोणतीही कारवाई केली नाही. कूपनलिका खोदल्यानंतर त्यांना वीज संयोजन किंवा वीज जोडणीदेखील देण्यात आली आहे.

ही वीजजोडणी देताना सात-बारा, शेताचा नकाशा किंवा अन्य बाबींची पडताळणी, तपासणी वीज कंपनीने केली का, स्थळ पाहणी करून वीज जोडणी या कूपनलिकांना दिली का, असा प्रश्नही जागरूक शेतकरी, नागरिक उपस्थित करीत आहेत.

प्रशासनाकडून चौकशीची अपेक्षा

फुपनगरी येथे गट क्रमांक ११ हा शासकीय मालकीचा भूखंड किंवा क्षेत्र आहे. हा गट गिरणा नदीनजीक आहे. या गटातही कूपनलिका असून, त्यात किती वैध व किती अवैध याची चौकशी, तपासणी करण्याची गरज आहे.

जशी वाळू उपशावर कारवाई केली जाते, तशी अवैध व पूररेषेतील पाणी उपशावरही कारवाई करायला हवी, अशी मागणी केली जात आहे. वीज संयोजन किती अश्वशक्तीसाठी दिले आहे, किती अश्वशक्तीचा कृषिपंप किंवा पंप कूपनलिकेत कार्यरत आहे याबाबतही चौकशी करण्याची मागणी केली जात आहे.