Crop Damage In Nashik : वादळी पावसाचा मालेगाव परिसराला फटका

Nashik News : मागील सप्ताहात मालेगाव तालुक्याला पूर्वमौसमी पावसाने झोडपले होते. त्यामुळे आंबा, शेवगा पिकांसह जनावरांचे गोठे व पोल्ट्री शेडचे मोठे नुकसान झाले होते. त्यातच आता पुन्हा एकदा गुरूवारी (ता. ८) मालेगाव शहर व परिसराला पावसाने तडाखा दिला.

त्यामुळे सर्वत्र तारांबळ उडाली होती. तर शहराच्या प्रामुख्याने उत्तर पूर्व भागातील शेवगा उत्पादक शेतकऱ्यांचे मोठे नुकसान झाले.

गुरुवारी दुपारनंतर वादळी वाऱ्याने तालुक्याच्या उत्तर पूर्व भागाला मोठा तडाखा दिला. ज्यामध्ये अनेक ठिकाणी झाडे उन्मळून पडली. तर अनेक शेतकऱ्यांचा साठवलेला कांदा भिजला. शेवगा व डाळिंब लागवडीचे पुन्हा नुकसान वाढले आहे. शहर व परिसरात सायंकाळी मृग नक्षत्राच्या पहिल्याच दिवशी वादळी वाऱ्यासह सुमारे २० मिनिटे जोरदार सरी कोसळल्या.

अचानक आलेल्या पावसामुळे सायंकाळी कामावरून परतणाऱ्या व रस्त्यावर खाद्यपदार्थ विकणाऱ्या तसेच बाजारपेठेतील नागरिकांची धावपळ उडाली. सटाणा नाका भागातील शिवम हॉटेलजवळ पत्रा लागून एक जण किरकोळ जखमी झाला. दरेगाव भागात पावसामुळे नाल्यांना पाणी आले.

पहिल्याच पावसात शहरातील विविध भागातील वीजपुरवठा खंडित झाला. शहर व परिसरात अवकाळी पावसाने व वादळी वाऱ्याने दाणादाण उडाली. तर अचानक नगर परिसरातील झोपडपट्टीतील अनेक घरांचे पत्रे वाऱ्यामुळे उडून गेले.

शहरात अनेक ठिकाणी झाडे उन्मळून पडली. पावसामुळे तीन तास शहराचा वीजपुरवठा खंडित होता. येथील पवारवाडी, शाह प्लॉट, दरेगाव भागातील सय्यद पार्क यासह भागातील रस्त्यावर पावसाचे पाणी साचल्याने चिखलाचे साम्राज्य झाले.

पावसामुळे जिल्हा परिषद शाळा व अचानक नगर परिसरात अनेक ठिकाणी पाणी साचले. हे पाणी वाहून जाण्यासाठी काही ठिकाणी भिंत तोडावी लागली.

लागवडी मोठ्या प्रमाणावर बाधित

वाऱ्यामुळे नवीन लागवडी व छाटून फुटलेल्या लागवडी मोठ्या प्रमाणावर बाधित झाल्या आहेत. त्यामध्ये अनेक झाडांवर लागलेल्या शेंगा व बहर गळून पडला आहे. त्यामुळे यंदाचा उन्हाळा हंगाम शेवगाव उत्पादक शेतकऱ्यांसाठी पुन्हा अडचणीचा ठरला अशी एकंदरीत परिस्थिती आहे. त्यामुळे उत्पादनावर परिणाम होणार आहे.