APMC Evaluation : राज्यातील बाजार समित्यांचे मूल्यमापन ‘पणन’कडून जाहीर

Pune News : राज्यातील बाजार समित्यांच्या २०२३-२४ या वर्षातील कामकाजाचे मूल्यमापन पणन संचालनालयाद्वारे जाहीर करण्यात आले आहे. त्यानुसार अनुक्रमे हिंगणघाट, कारंजालाड आणि बारामतीचा प्रथम, द्वितीय आणि तृतीय क्रमांक आहे. तर खासगीमध्ये कॉटनसिटी (यवतमाळ), किसान मार्केट (पुसद) आणि परफेक्ट (नाशिक) या बाजार समित्यांचा समावेश आहे, अशी माहिती पणन संचालक विकास रसाळ यांनी दिली.

दरम्यान, पहिल्या १० बाजार समित्यांमध्ये पुणे, मुंबई, नाशिक, नागपूर, या मोठ्या आणि महत्त्वाच्या बाजार समित्यांना स्थान मिळाले नसल्याबाबत आश्‍चर्य व्यक्त होत आहे. जागतिक बँकेच्या अर्थसाह्याने बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्पांतर्गत राज्यातील बाजार समित्यांच्या कामकाजावर वार्षिक मूल्यमापन केले जाते.

हे मूल्यमापन करताना, बाजार समित्यांमधील विक्री व्यवस्था, पायाभूत सुविधा, आर्थिक नियोजन, शासकीय योजना आणि उपक्रम राबविणे आदी विविध ३५ निकषांवर २०० गुणांचे मूल्यमापन करण्यात आले. तर खासगी बाजार समित्यांसाठी ४० निकष आणि २५० गुणांचे मूल्यमापन करण्यात आले. या मूल्यमापनासाठी तालुका, जिल्हा आणि राज्यपातळी असे स्तर ठरविण्यात आले होते. विविध स्तरांवर झालेल्या मूल्यमापनानंतर अंतिम आकडेवारी जाहीर करण्यात आली.

प्रथम १२ बाजार समित्या आणि मिळालेले गुण
बाजार समिती ---- जिल्हा ---- गुण
हिंगणघाट ---- वर्धा ---- १७८
कारंजा लाड --- वाशीम --- १७१.५
बारामती --- पुणे ---- १६५
लासलगाव --- नाशिक --- १६५
पंढरपूर --- सोलापूर --- १५५.५
चांदूर बाजार ---- अमरावती --- १५५.५
अकोला --- अकोला --- १५४.५
उमरेड --- नागपूर --- १५२.५
अकलूज --- सोलापूर --- १४९
मंगळूरपीर ---- वाशीम --- १४९
लातूर --- लातूर --- १४८.५
संगमनेर --- अहिल्यानगर ---- १४८

खासगी बाजार समित्या कॉटनसिटी (भोयर, जि. यवतमाळ) --- १७५.५ किसान मार्केट (शेलू, यवतमाळ) --- १५४.५ परफेक्ट कृषी (नांदूर, नाशिक) --- १४६.५ ंरंगराव पाटील (उदगीर, लातूर) --- १४२.५ श्री गजानन (पळसगाव, जि. हिंगोली) --- १४१.५