Fertilizers Sugarcane Crop : नंदुरबार जिल्ह्यात ऊस पिकात खते देण्यास वेग

Nandurbar : खानदेशात ऊस पिकाची लागवडही बऱ्यापैकी आहे. ऊन कमी झाल्याने सध्या शेतकरी पिकात आंतरमशागत किंवा तणनियंत्रण, खते देण्याचे काम करीत आहेत. अतिउष्णतेत खते देण्याचे काम अनेकांनी थांबविले होते.

मागील १५ दिवसांत अनेक दिवस कमाल तापमान ३९ अंश सेल्सिअसपेक्षा कमी राहिले आहे. अनेकदा दुपारीदेखील तापमान ३५ अंश सेल्सिअस एवढे असते. याचा लाभ पीकवाढीस होत असून, शेतकरीदेखील त्यासंबंधी कार्यवाही करून घेत आहेत.

एप्रिलमध्ये उष्णता वाढल्याने सिंचनासह अन्य बाबींची कार्यवाही शेतकरी करीत होते. पण मेमध्ये हा सिंचनाचा ताण कमी दिसत आहे. जळगावात उसाखाली सुमारे १४ हजार हेक्टर एवढे क्षेत्र आहे. तसेच धुळ्यातली पाच हजार हेक्टरवर ऊस आहे. धुळ्यातील शिरपूर, साक्री भागात ऊस पीक आहे. ऊस पीक अतिपावसाने काही भागात हवे तसे वाढले नाही. परंतु अनेक शेतकऱ्यांनी जिद्दीने खत व अन्य बाबींचे व्यवस्थापन करून पीक वाढविले आहे.

नंदुरबारमधील तळोदा व शहादा तालुक्यात पाण्याची उपलब्धता पाहता बहुतांश बागायतदार शेतकऱ्यांनी पूर्वहंगामी व सुरू हंगामातील उसाची लागवड केली आहे. शहादा तालुक्यात सुमारे आठ हजार हेक्टरवर ऊस पीक आहे. नंदुरबारमध्ये सुमारे १६ हजार हेक्टवर ऊस पीक आहे.

शेतीमालाला खर्चाच्या तुलनेने मिळणारे कवडीमोल दर, मजूरटंचाई यामुळे अनेक शेतकऱ्यांनी ऊस लागवडीला पसंती दिली आहे. खानदेशात तळोदा, शहादा, धुळ्यातील शिरपूर, जळगावातील चोपडा, चाळीसगाव, यावल आदी तालुक्यांत कूपनलिकांच्या सहाय्याने उसाची शेती केली जाते. विविध कडधान्यांचे उत्पादन घेतले जाते. नंदुरबारमध्ये चार कारखाने आहेत. त्यामुळेही लागवडीला बळ मिळाले आहे.