Jalgaon News : खानदेशात पूर्वहंगामी किंवा बागायती कापसाची लागवड सुमारे एक लाख ७५ हजार हेक्टरवर झाली आहे. या पिकात आंतरमशागतीसह खते देण्याचे काम गतीने सुरू आहे. पीकस्थिती बरी असून, काही शेतकरी फवारणीदेखील घेत आहेत.
जळगाव जिल्ह्यात सुमारे सव्वालाख हेक्टरवर बागायती कापूस पीक आहे. तर धुळे व नंदुरबारातही सुमारे ६० हजार हेक्टरवर पूर्वहंगामी कापसाची लागवड झाली आहे. सध्या ढगाळ व पावसाळी वातावरण आहे. यामुळे प्रतिबंधात्मक बाब म्हणून शेतकरी कीडनाशके, संप्रेरकांची फवारणी घेत आहेत. खानदेशात बागायती कापूस पिकाची लागवड मे महिन्याच्या दुसऱ्या पंधरवड्यात सुरू झाली.
तापी, गिरणा, अनेर, वाघूर, पांझरा आदी नद्यांच्या क्षेत्रात लागवड सुरू झाली. उष्णता अधिक असतानाही शेतकऱ्यांनी लागवडीचे धाडस केले. बीजांकुरण बऱ्यापैकी झाले. पीकवाढ चांगली आहे. अनेक शेतकऱ्यांचे कापूस पीक आता ३० ते ३५ दिवसांचे झाले आहे. त्यात एक वेळेस आंतरमशागत करण्यात आली आहे.
तसेच खतांचा पहिला व काहींनी दुसरा बेसल डोसही दिला आहे. एक फवारणीदेखील ३५ दिवसांच्या कापूस पिकात अनेक शेतकऱ्यांनी घेतली आहे. पिकात तणनियंत्रणाचे कामही सुरू आहे. पाऊस नसल्याने तणनाशकाची फवारणी शेतकऱ्यांनी टाळली होती. परंतु आता पाऊस आल्याने शेतकरी तणनाशकांची फवारणीदेखील पिकात घेत असल्याची स्थिती आहे.
उशिराची पेरणीही जोमात
अनेक शेतकऱ्यांनी १५ जूननंतर कापसाची लागवड केली आहे. या कापूस पिकातही बीजांकुरण चांगले झाले आहे. काही शेतकऱ्यांनी कापसाऐवजी पपई लागवडीचे नियोजन केले होते. परंतु पपई लागवड वाढली आहे. तसेच पपईत विषाणूजन्य रोग येत आहेत. यामुळे अनेकांनी पपईची लागवड रद्द केली व त्याऐवजी कापसाला पसंती दिली, अशी स्थिती खानदेशात आहे.
खतांची अडचण
खते हवी ती व हवी तेवढी मिळत नसल्याची स्थिती आहे. कमाल कापूस उत्पादकांनी १०.२६.२६ हे खत कापूस पिकाला देण्याचे नियोजन केले होते. परंतु खानदेशात हंगामाच्या सुरुवातीलाच १०.२६.२६ व युरियाची टंचाई आहे. यामुळे शेतकरी अन्य खते पिकास देऊन खतांची मात्रा पूर्ण करून घेत आहेत. खते स्थानिक क्षेत्रात किंवा परिसरातील कृषी केंद्रांत उपलब्ध नसल्याने ती तालुक्याच्या भागातून किंवा अन्य क्षेत्रातून शेतकऱ्यांना आणावी लागत आहेत. खते उघड्यावर न देता त्यावर माती टाकून ती पुरली जात आहेत. कारण पाऊस कमी - अधिक होत आहे. यामुळे माती व त्यासोबत खतेही वाहून जातील व नुकसान होईल, अशी भीती शेतकऱ्यांना आहे.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.