Soybean Production : सोयाबीनचा उतारा अर्ध्यापेक्षाही कमी

Washim News : सोयाबीनचा हंगाम सुरू झाला आहे. कापणी व मळणीच्या कामांनी वेग घेतला आहे. यंदा दरवर्षीपेक्षा अर्धाही उतारा नाही. त्यामुळे शेतकरी कमालीचे चिंताग्रस्त झाले आहेत. उशिरा व अनियमित पाऊस, उशिराची पेरणी, ‘येलो मोझॅक’मुळे सोयाबीनचे पीक हातातून गेले आहे.

परिणामी, सोयाबीन उत्पादक आर्थिक अडचणीत आला आहे. पीकविमा भरपाईसह सरकारनेही मदत करावी, अशी मागणी शेतकरी करीत आहेत. सध्या एकरी तीन ते चार क्विंटल उत्पादन मिळू लागले आहे.

सोयाबीन हे शेतकऱ्यांचे मुख्य पीक झाले आहे. एकूण क्षेत्राच्या ९० टक्के सोयाबीनची पेरणी केली जाते. खरीप हंगाम हा शेतकऱ्यांसाठी अतिशय महत्त्वाचा मानला जातो. कोरडवाहू शेतकऱ्यांची या हंगामावरच खरी भिस्त अवलंबून असते.

या वर्षी खरिपाच्या पेरण्या तब्बल एक महिना उशिराने झाल्या. सुरुवातीपासूनच पाऊस अनियमित पडल्यामुळे सोयाबीनसह खरिपाची सर्वच पिके संकटात सापडली होती. सोयाबीन फुलोऱ्यात असताना पावसाने मोठा खंड दिला.

त्याचा परिणाम आता दिसून येत आहे. त्यानंतर शेंगा परिपक्व होण्याच्या कालावधीत ‘येलो मोझॅक’चा प्रादुर्भाव झाला. त्यामुळे उत्पादनात मोठी घट येत आहे.

सध्या सोयाबीन सोयाबीन काढणी सुरू झाली आहे. यंत्राद्वारे मळणीचे काम सुरू आहे. दरवर्षीच्या तुलनेत या वर्षी सोयाबीनचा उतारा अर्ध्यापेक्षाही कमी येत आहे. काढणीसह इतर सर्व खर्चात २५ टक्क्यांनी वाढ झाली आहे. सोयाबीनचे भावसुद्धा ४ हजारांवर येऊन ठेपले आहेत.