Soybean Sowing : खानदेशात यंदा सोयाबीनचे क्षेत्र वाढले

Jalgaon News : खानदेशात सोयाबीनची पेरणी यंदा काहीशी वाढली आहे. पेरणी सुमारे ४५ हजार हेक्टरवर झाली आहे. एकट्या जळगाव जिल्ह्यातील पेरणी सुमारे ३४ हजार हेक्टरपर्यंत असल्याची माहिती आहे.

धुळे व नंदुरबारात सोयाबीनची पेरणी कमी असते. या भागात शेतकऱ्यांनी सोयाबीनऐवजी मका, कापूस आदी पिकांना पसंती दिली आहे. सोयाबीनचे उत्पादन वाढेल, कारण पाऊसमान बरे आहे, अशी भीती शेतकऱ्यांना होती. यामुळे नंदुरबार, धुळ्यातील पेरणी फारशी वाढलेली नाही. जळगाव जिल्ह्यात सोयाबीनची पेरणी मागील महिन्यातच बऱ्यापैकी झाली आहे. त्यात कमी कालावधीत येणाऱ्या वाणांना पसंती देण्यात आली आहे. काही शेतकऱ्यांनी तुषार सिंचन, ठिबकच्या माध्यमातून सोयाबीनचे सिंचन करण्याची व्यवस्था केली आहे.

सोयाबीनचे दर मागील खरिपात बऱ्यापैकी होते. किमान ४२०० व कमाल ५००० रुपये प्रतिक्विंटलचा दर अनेकांना हंगामात मिळाला. नंतरही दर टिकून होते. आता पेरणीच्या वेळेसही दर ४२०० ते ४३०० रुपये प्रतिक्विंटल, असे होते. परंतु अन्य पिकांचा पर्याय चांगला नसल्याने सोयाबीनची पेरणी शेतकऱ्यांनी केली. पुढेही चार हजार रुपयांवर दर टिकून राहतील व अधिकचा नफा मिळेल, या नियोजनातून शेतकऱ्यांनी सोयाबीनची पेरणी केली आहे.

सोयाबीनची पेरणी धुळे, नंदुरबारात वाढण्याची शक्यता फारशी नव्हती. या दोन्ही जिल्ह्यांत सुमारे १२ हजार ६०० हेक्टरवर सोयाबीन पीक आहे. जळगाव जिल्ह्यात सोयाबीनची पेरणी २८ हजार हेक्टरवर अपेक्षित होती. परंतु पेरणी वाढली आहे. पेरणीनंतर पाऊस आल्याने पेरणी यशस्वी झाली आहे. दुबार पेरणीची वेळ अपवाद वगळता आलेली नसल्याचे सांगण्यात आले.

पेरणी काळ्या कसदार जमिनीत अधिक सोयाबीनची पेरणी गिरणा, तापी, वाघूर नदीच्या क्षेत्रात झाली आहे. जळगाव जिल्ह्यात सोयाबीन रावेर भागात कमी आहे. परंतु यावल, चोपडा, पाचोरा, जामनेर, भडगाव, चाळीसगाव, धरणगाव, जळगाव, अमळनेर, धुळ्यातील शिरपूर, नंदुरबारातील शहादा, तळोदा भागात सोयाबीन आहे. सोयाबीन पीक अनेकांचे २० दिवसांचे झाले आहे. काहींचे पीक फूटभर उंचीचे झाले आहे. पेरणी जनच्या सुरुवातीलाच अनेकांनी केली होती.

यामुळे काही शेतकऱ्यांचे पीक बऱ्यपैकी दिसत आहे. त्यात एक वेळेस रासायनिक खतही अनेकांनी दिले आहे. काळ्या कसदार जमिनीतील पीक चांगले असून, वाढ होत आहे. अनेक शेतकऱ्यांनी लहान फळबागांमध्ये आंतरपीक म्हणून सोयाबीनची पेरणी केली आहे. काही शेतकऱ्यांनी खरिपात उत्पादन घेतल्यानंतर आपल्याकडील बियाण्यांची उगवणक्षमता तपासून त्यावर बीजप्रक्रिया करून पेरणी केली आहे. यामुळे बियाण्यांवरील मोठा खर्च शेतकऱ्यांनी कमी केल्याची माहिती मिळाली.