Rabi Season 2024 : खानदेशात पेरण्यांना आली गती

Jalgaon News : खानदेशात पाऊसमान चांगले होते. यामुळे काळ्या कसदार जमिनीत पेरणीची स्थिती नव्हती. परंतु आता वाफसा होत असून, पेरणीला गती येत आहे. पेरणीची टक्केवारी २० पेक्षा अधिक झाली आहे.

हलक्या, मुरमाड जमिनीच्या भागात पेरण्या झाल्या आहेत. काळ्या कसदार जमिनीच्या भागात पावसाने नुकसान झाले. त्यात मागील महिन्यातही पेरणीसाठी वाफसा नव्हता. यामुळे पेरणी रखडली होती. परंतु दिवाळीनंतर पेरणी सुरू झाली आहे. नीरभ्र वातावरण असल्याने शेतीकामांनी जोर धरला आहे.

सततचा पाऊस ऑक्टोबरमध्येही होता. काही भागांत दसरा सणाच्या काळात अतिजोरदार पाऊस झाला होता. अन्य भागात तुरळक पाऊस झाला. यामुळे पिके हातची गेली. तसेच रब्बी पेरणीलाही खिळ बसली. कारण शेतांत तण वाढले. वाफसा नसल्याने तण काढता येत नव्हते. परंतु या आठवड्यात शेतीकामांनी वेग घेतला आहे.

केळी, तूर आदी पिकांत कामे सुरू आहेत. तसेच केळी लागवडीसह मका, भाजीपाला लागवडही सुरू आहे. लहान केळी बागांसह उसातही तण वाढले होते. हे तण काढण्याचे काम प्राधान्याने सुरू आहे. कारण तणामुळे मुख्य पिकाच्या मुळा व तणाच्या मुळांची स्पर्धा होते व यात मुख्य पिकाच्या वाढीला फटका बसतो.

मुख्य पिकास खतेही तण वाढल्याने दिली जात नव्हती. परंतु आता आंतरमशागतीला वेग आला आहे. तण गतीने काढले जात असून, लागलीच बैलांकरवी आंतरमशागत केली जात आहे. यानंतर खते दिली जात आहेत.

मागील दोन दिवसांत मशागतीला वेग आला आहे. मजुरांकरवी कापूस वेचणीसह अन्य कामे करून घेतली जात आहे. मागील दोन-तीन दिवसांत पेरणीची टक्केवारी आणखी वाढली आहे. खानदेशात रब्बीची पेरणी चार लाख हेक्टरवर होईल. जळगावातील पेरणी अडीच लाख हेक्टरवर अपेक्षित आहे. त्यात हरभऱ्याची पेरणी सव्वा लाख हेक्टरवर होईल.

मजूरटंचाई कायम

खानदेशात मजूरटंचाई कायम आहे. आता एकाच वेळेस अनेक शेतकऱ्यांच्या शेतात कामे सुरू झाली आहेत. यामुळे मजुरांची गरजही अधिक आहे. नीरभ्र वातावरण असल्याने शेतकरी कामे उकरून घेत असून, निवडणुकीची धूम सुरू असल्याने मजूरटंचाई तयार झाली आहे. यामुळे अन्य गावांतून मजूर आणावे लागत आहेत. मजुरी दर १८० ते २०० रुपये प्रतिरोज, असा दिला जात आहे. काहींनी मजूरटंचाईमुळे घरातील मंडळीच्या मदतीने कामे करून घेण्याचा प्रयत्न केला आहे.