Agriculture Solar Pump : पैसे भरूनही सौरपंप मिळेना

Ahilyanagar News : शेतकऱ्यांसाठी ‘मागेल त्याला सौर कृषिपंप’ ही योजना वरदान ठरली आहे. मात्र, पैसे भरूनही सात महिने झाले तरी कंपनीकडून सौर पंपाचा पुरवठा केला जात नसल्याने शेतकरी संभ्रमात पडले आहेत.

शेतकऱ्यांना सिंचनासाठी दिवसा विनामूल्य वीज उपलब्ध व्हावी, या उद्देशाने ही योजना सुरू करण्यात आली. या योजनेअंतर्गत शेतकऱ्यांना ३ एचपी, ५ एचपी, ७.५ एचपी क्षमतेचे पंप दिले जातात. या पंपाचा पुरवठा करण्यासाठी अनेक कंपन्या उपलब्ध आहेत.

अनेक महिन्यांपासून शहरटाकळी, दहिगांवनेसह परिसरात अनेक शेतकऱ्यांनी शुल्क भरणा करून कंपनीची निवड केली आहे. मात्र अशा शेतकऱ्यांना जवळपास तीन ते चार महिन्यांहून अधिक कालावधी होऊनही सौरपंप दिला जात नसल्याने ही योजना मृगजळ ठरल्याची चर्चा आहे.

शेतात शेतकऱ्यांना महावितरण कंपनी दिवसा व रात्री अशा सत्रात शेतीसाठी आठ तास वीज पुरवठा देते. तोही कमी दाबाचा असतो. त्यामुळे शेतकऱ्यांना पिकांना पाणी देण्यासाठी अडचण येत होती.

परंतु, दिवसा वीज उपलब्ध व्हावी, जेणे करून शेतकऱ्यांना रात्री शेतात पिकांना पाणी देताना अनेक हिंस्र प्राणी, साप आदींपासून जीविताला धोका उत्पन्न होणार नाही. यासाठी राज्य शासनाने ‘मागेल त्याला सौरपंप’ ही योजना आणली.

या योजनेअंतर्गत सर्वसाधारण प्रवर्गातील शेतकऱ्यांना ४० आर. ते १ हेक्टर क्षेत्रासाठी ३ एचपीचा पंप खर्च २३ हजार रुपये, १ ते २ हेक्टरांसाठी ५ एचपीचा पंप ३२,१०० व पाच हेक्टर पेक्षा जास्त ७.५ एचपीचा पंप ४५ हजार रुपये शुल्क भरून सौरपंप उपलब्ध करून दिले आहेत. यामुळे शेतकऱ्यांना रात्री शेतात जाण्याची गरज नाही.मात्र पैसे भरूनही पंप उपलब्ध झालेले नसल्याने शेतकऱ्यांतून नाराजी व्यक्त होत आहे.

सौरपंप योजनेमुळे फायदा

सौर कृषिपंप योजनेमुळे शेतकऱ्यांना विविध फायदे होणार आहेत. सध्या कृषीसाठी मिळणारी ही वीज दिवसा किंवा रात्री फक्त आठ तासांसाठी मिळत आहे. सौरपंपामुळे ही वीज अखंडपणे उपलब्ध होणार आहे. मात्र पंप मिळण्यास दिरंगाई होत असल्यामुळे शेतकऱ्यांतून नाराजी व्यक्त होत आहे.