Farmer Support: सोलार पॅनल खराब झाले? शेतकऱ्यांनो, अर्ज करा आणि त्वरित सहाय्य मिळवा!

Pune News: ‘कुसूम’ आणि ‘मागेल त्याला सौर कृषीपंप’ या योजनांच्या अंतर्गत राज्यातील लाखो  शेतकऱ्यांना कृषीपंप’ देण्यात आले आहे.मात्र वादळी पाउस आणि इतर कारणांनी सोलार पॅनलचे नुकसान होते. मात्र शेतकऱ्यांनी काळजी करण्याची गरज नाही.एक अर्ज भरून शेतकऱ्यांना सोलर पॅनलची दुरुस्ती करून मिळेल किंवा भरपाई मिळेल .त्यासाठी प्रक्रियादेखील सोपी आहे.

मे महिन्यातील वादळी वारे आणि अवकाळी पावसाने राज्यातील शेतकऱ्यांच्या सौर कृषीपंपांचे मोठ्या प्रमाणात नुकसान केले आहे. अनेक ठिकाणी विहिरी आणि बोअरवेलवरील सोलार पॅनल्स तुटली, वाकली किंवा पूर्णपणे नष्ट झाली आहेत. यामुळे शेतकऱ्यांना शेतीसाठी पाणी आणि विजेच्या समस्यांना तोंड द्यावे लागत आहे.

परंतु, शेतकऱ्यांसाठी दिलासादायक बाब म्हणजे सरकारच्या योजनांद्वारे या नुकसानीसाठी दुरुस्ती किंवा आर्थिक मदत मिळू शकते. यासाठी शेतकऱ्यांनी त्वरित अर्ज करणे आवश्यक आहे.नैसर्गिक आपत्तीमुळे सोलार पॅनल्सचे नुकसान झाले तरी शेतकऱ्यांना काळजी करण्याची गरज नाही. योग्य मार्गाने अर्ज केल्यास पॅनल्स दुरुस्त होऊ शकतात किंवा भरपाई मिळू शकते.

महावितरणने शेतकऱ्यांना या संधीचा लाभ घेण्याचे आणि वेळीच अर्ज करण्याचे आवाहन केले आहे. ‘कुसूम’ आणि ‘मागेल त्याला सौर कृषीपंप’ योजनेंतर्गत बसवलेल्या सोलार पंपांची देखभाल आणि दुरुस्ती संबंधित कंपनी पाच वर्षे मोफत करते. शेतकऱ्यांनी नुकसानीचे तपशील, फोटो आणि आवश्यक कागदपत्रांसह अर्ज सादर करावा.

अर्ज कसा कराल?

ऑनलाइन पद्धत: सोलार पॅनल दुरुस्ती किंवा भरपाईसाठी शेतकरी ऑनलाईन पद्धतीने अर्ज करू शकतात. त्यासाठी ‘कुसूम योजना’ किंवा ‘मागेल त्याला सौर कृषीपंप’ या संकेतस्थळांवर नुकसानीची तक्रार नोंदवावी.

तक्रार करताना नुकसानीचे फोटो आणि इतर तपशील अपलोड करावे लागतील.ऑफलाइन पद्धत: ऑनलाईन तक्रार शक्य नसल्यास शेतकऱ्यांना जवळच्या महावितरण कार्यालयात नुकसानीचा अर्ज भरता येईल. अर्ज करताना पंपाचा नंबर आणि युनिट नंबर आवश्यक आहे.