Kesar Mango : लाडका केसर आंबा आला

Chhatrapati Sambhajinagar News : ग्राहकांचा लाडका केसर आंबा यंदा लवकर येण्याचे संकेत खरे ठरले आहेत. तुळजापूर, पंढरपूर व सांगोला भागातील काही बागांमधील आंबा मार्चअखेर काढायला आला. केसर आंब्याचे उत्पादन सरासरी राहील, असे दिसत असले तरी सद्यःस्थितीत होत असलेली गळ व नैसर्गिक आपत्तीची भीती यामुळे, ‘पदरात पडेल तेच खरं’ अशी भावना केसर आंबा उत्पादक व्यक्त करीत आहेत.

कोकणा व्यतिरिक्त इतर राज्याच्या इतर भागात ४५ हजार हेक्‍टरवर आंबा लागवड आहे. त्यापैकी साधारणतः १० ते १५ हजार हेक्टर बागा उत्पादनक्षम तर त्यातील काही बागा २० ते २५ वर्षे जुन्या आहेत. नवीन ८ ते १० वर्षातील बहुतेक बागा अतिघन लागवड पद्धतीच्या आहेत. मराठवाड्यासह राज्यातील केसर आंबा बागा साधारणतः: डिसेंबर, जानेवारीमध्ये मोहरतात. यंदा मोहर लागणे नोव्हेंबर ते फेब्रुवारी दरम्यान चार टप्प्यांत सुरू राहिले.

फेब्रुवारीअखेर बहुतेक सर्वच बागा मोहरल्या. उत्पादकांनी तज्ज्ञांच्या मार्गदर्शनात व्यवस्थित व्यवस्थापन केल्याने अनेक केसर आंबा बागा पाऊस लांबला तरी नेहमीच्या वेळेपूर्वी महिनाभर आधी म्हणजे नोव्हेंबरमध्येच मोहरणे सुरू झाल्या. सुरवातीला मोहरलेल्या काही बागेतील आंबा २० मार्चनंतर काढणीला आला. वेळीच कल्टारचा वापर, त्यामुळे मोहर लवकर तर आंबा लवकर असे गणित जुळून आल्याचे तज्ज्ञांनी सांगितले.

...असे आहेत दर

हापूस, गुजरात केसरला चुकवून आलेला केसर आंबा दरही चांगले घेत आहे. वाशी मार्केटमध्ये चांगल्या केसर आंब्याला २०० ते २१० रुपये प्रतिकिलोचा तर दुय्यम दर्जाच्या आंब्याला १३० ते १८० रुपये प्रतिकिलोचा दर आहे.

तर थेट शेतावरून १७५ ते २०० रुपये प्रतिकिलो, मॉलमध्ये ४४५ रुपये प्रतिकिलोपर्यंत तर हातावरच्या विक्रीतून ३०० ते ३५० रुपये प्रति किलोपर्यंतचा केसर आंब्याला दर मिळत असल्याचे शेतकऱ्यांनी सांगितले. काही बागांना गारपीट, अवेळी पाऊस तसेच कमी पाण्याचा फटकाही बसला आहे.

अच्छादन व फळसंरक्षक बॅगचा वापर

उन्हापासून तसेच किडींपासून संरक्षणासाठी यंदा मोठ्या प्रमाणात केसर आंबा उत्पादकांनी फळांना संरक्षक बॅग वापरण्यावरही भर दिला. याशिवाय अनेक उत्पादकांनी पाण्याच्या कार्यक्षम वापरासाठी नैसर्गिक व कृत्रिम साधनांचा वापर करून अच्छादन करण्यावरही भर दिला आहे.

पावसाने गणित बिघडवले

यंदा मराठवाड्यातील केसर आंबा मोहरण्याचे गणित बिघडवण्याचे काम अपेक्षेच्या वेळी न आलेल्या व अपेक्षा नसताना आलेल्या पावसाने बिघडवले. त्यामुळे एक किंवा दोन टप्प्यात येणे अपेक्षित असलेला मोहर चार ते पाच टप्प्यांत आला. एप्रिलमध्ये दुसऱ्या टप्प्यातील मोहराचे, मे मध्ये तिसऱ्या, जून मध्यापर्यंत चौथ्या टप्प्यातील मोहराचे उत्पादन येणे अपेक्षित असल्याचे तज्ज्ञ सांगतात.