Water Scarcity : शुकनदीचे पात्र कोरडे

Sindhudurg News : जिल्ह्यातील शुकनदीचे (ता. वैभववाडी) पात्र कोरडे पडले आहे. या नदीच्या पाण्यावर अवलंबून असलेली शेकडो एकर शेती संकटात येण्याची भीती निर्माण झाली आहे. काही किरकोळ डोहांमध्ये असलेले पाणी एक-दोन दिवसांत संपण्याची शक्यता आहे. त्यामुळे शेतीला पाणी द्यायचे कसे, असा प्रश्न निर्माण झाला आहे.

जिल्ह्यात तापमान ३८ अंश सेल्शियसवर पोहोचले आहे. गेला महिनाभर तर जिल्ह्यात प्रचंड उष्णता जाणवत आहे. त्यामुळे नदी-नाल्यांच्या पाणीपातळीत झपाट्याने घट झाली. जिल्ह्यातील प्रमुख नद्यांची पाणीपातळी चिंताजनक आहे. लघु प्रकल्पांतील पाणीसाठा देखील कमी होत आहे.

दरम्यान, वैभववाडी तालुक्यातील शुकनदीचे पात्र कोरडे पडले आहे. या नदीवर वैभववाडी, सोनाळी, नापणे, उंबर्डे या गावांसह शेकडो गावांतील ऊसशेती आणि फळबागा अवलंबून आहेत. सध्या या नदीतील काही डोहांमध्ये किरकोळ स्वरूपात पाणी आहे.

हे पाणी देखील येत्या एक दोन दिवसांत कमी होण्याची शक्यता आहे. त्यामुळे शेतीला पाणी कसे द्यायचे, असा प्रश्न शेतकऱ्यांसमोर आहे. शेतकऱ्यांमधून खांबलवाडी लघू प्रकल्पाचे पाणी शुकनदीत सोडावे, अशी मागणी करण्यात येत आहे.