Sharad Pawar : ‘लाडकी बहीण योजने’बाबत ‘मविआ’विरोधात खोटा प्रचार

Satara News : ‘लाडकी बहीण’ योजनेबाबत महाविकास आघाडीविरोधात महायुतीने खोटा प्रचार केला. त्यामुळे महिलांनी आमच्याविरोधात मतदान केले. आमच्या अपेक्षेप्रमाणे निकाल लागला नसला तरी लोकांनी दिलेला निर्णय असून आम्हाला तो मान्य आहे.

आमचा पराभव झाला असला तरी लोकांमध्ये जाऊन पुन्हा जोमाने कामाला लागणार आहोत, असा विश्वास राष्ट्रवादी काँग्रेसचे (शरदचंद्र पवार गट) अध्यक्ष शरद पवार यांनी व्यक्त केला. बटेंगें तो कटेंगेमुळे मतांचे ध्रुवीकरण झाले, असेही पवार यांनी स्पष्ट केले.

विधानसभा निकालात महायुतीला सर्वांत जास्त जागा मिळाल्या आहेत. या निकालानंतर शरद पवार रविवारी (ता. २४) कऱ्हाड (जि. सातारा) दौऱ्यावर आले आहेत. त्यादरम्यान त्यांनी पत्रकारांशी संवाद साधला. पवार म्हणाले, ‘‘महायुतीने ‘लाडकी बहीण योजने’बाबत महाविकास आघाडीविरोधात खोटा प्रचार केला. हे सरकार गेले तर ‘मविआ’ लाडकी बहीण योजना बंद करेल, असा खोटा प्रचार महायुतीने केला.

त्यामुळे महिलांनी आमच्याविरोधात मतदान केले असल्याचे काही कार्यकर्त्यांनी मला सांगितले. त्यामुळे याचा फटका आम्हाला बसला असावा. आमच्या अपेक्षेप्रमाणे निकाल लागला नाही. हा लोकांनी दिलेला निर्णय असून आम्हाला तो मान्य आहे.

लोकसभेच्या निकालानंतर आम्हाला जास्त विश्वास होता. आता परत जोमाने कामाला लागणार आहोत. तळागाळात जाऊन अजून चांगले काम करणार आहोत. अधिकृत आकडेवारी आल्यावर त्याचा अभ्यास आणि विश्लेषण करणार आहोत.’’

शरद पवार म्हणाले, की अजित पवार यांना जास्त जागा आल्या हे मान्य करणे गैर नाही. मी बारामतीत उमेदवार दिला नसता तर वेगळा मेसेज गेला असता. तसेच नवखा आणि अनुभवी उमेदवार लढत याबाबत आम्हाला कल्पना होती.

त्यामुळे अजित पवार आणि युगेंद्र पवार यांची तुलना होऊ शकत नाही, असे म्हणत शरद पवार यांनी, युगेंद्र पवार यांचा झालेला पराभव मान्य केला.

निकालानंतर उद्धव ठाकरे आणि संजय राऊत यांनी ‘ईव्हीएम’वर प्रश्न उपस्थित केले होते. त्यावर पवार यांनी, याबाबत अधिकृत माहिती नसल्यामुळे मी ईव्हीएमवर भाष्य करणार नाही. अधिकृत माहिती घेऊन याबाबत अधिक बोलेन, असे सांगितले.

मी काही घरी बसणार नाही

पराभवानंतर शरद पवार घरी बसतील, अशी टिप्पणी त्यांचे काही विरोधक करत आहेत. त्यावर शरद पवार म्हणाले, की मी काही घरी बसणार नाही. काल निकाल लागला आणि आज मी कऱ्हाडमध्ये आहे. दिल्लीतील अधिवेशन झाल्यानंतर लगेच राज्यात येऊन पुन्हा जोमाने कामाला लागणार आहे.