Sharad Pawar : तासगाव साखर कारखान्याची दयनीय अवस्था करणाऱ्यांना जागा दाखवा; शरद पवार

Sangli Tasgaon Politics : तासगाव- कवठेमहांकाळ विधानसभा मतदारसंघातील महाविकास आघाडीचे शरदचंद्र पवार पक्षाचे उमेदवार रोहित पाटील यांच्या प्रचारार्थ राष्ट्रवादी काँग्रेसचे अध्यक्ष शरद पवार यांची शुक्रवारी (ता. १५) मणेराजुरी येथे आयोजित करण्यात आली होती यावेळी शरद पवार यांनी माजी खासदार संजय पाटील यांच्यावर जोरदार टीका केली. तसेच पवार यांनी रोहित पाटील यांना विधानसभेत पाठवण्यासाठी मोठ्या मताधिक्याने विजयी करावे असे आवाहन केलं.

यावेळी खासदार शरद पवार म्हणाले की, "मागच्या काही महिन्यांपूर्वी मी या भागात आलो होतो यावेळी बेदाणा आणि द्राक्षाच्या समस्या घेऊन काही शेतकरी माझ्याकडे आले. या शेतकऱ्यांनी मला सांगितल स्वर्गीय आर. आर. पाटील यांच्या नावाने बेदाणा मार्केट कमीटी काढणार आहे. यावर मी तुम्हाला सांगू इच्छीतो सांगलीकरांनी द्राक्षाची शेती कष्ट करून उभारली आहे. या भागातील बेदाणा आणि द्राक्षे जगभर प्रसिद्ध केली. या बेदाण्यासाठी इथले शेतकरी नवी मार्केट उभे करत आहेत. या शेतकऱ्यांनी रोहीत पाटील यांच्यासोबत राहावं मी तुमच्यासोबत असेन" असा शब्द शरद पवार यांनी दिला.

"सांगलीच्या लोकांनी संजय पाटील यांना काम करण्याची संधी दिली. साखर कारखाना इथे उभा केला परंतु या कारखान्याची काय अवस्था काय केली. सहकारी साखर कारखान्यांचा जिल्हा म्हणून सांगलीची ओळख होती परंतु या जिल्ह्यात तासगाव साखर कारखान्याची परिस्थिती बिकट होते ही गंभीर बाब आहे. साखर कारखान्याबरोबर इथल्या सहकारी संस्थांचीही माजी खासदारांनी या अवस्था केली हे तासगावकरांनी माहिती करून घ्यावं" असेही पवार म्हणाले.

"समाजाचं चुकीचं नेतृत्व करणारी व्यक्ती रोहीत पाटील यांच्या विरोधात उभी असेल तर त्यांना त्यांची जागा दाखवा. रोहीत तरूण वयात लोकांच्या मनातले प्रश्न जाणून सेवा करत आहे. तासगाव तालुक्याची जनता स्वातंत्र्य काळापासून देशासाठी योगदान देत आहे. मोठा इतिहास असलेल्या जनतेने रोहीत पाटील यांना मोठ्या मताधिक्याने विधानसभेत तुमच्या तालुक्याचे नेतृत्व करण्याची संधी द्यावी" असे पवार म्हणाले.