Kolhapur Shahi Dasara : कोल्हापुरात शाही दसरा दिमाखात

Kolhapur News : संस्थान काळातील सैनिक वेशातील घोडेस्वार, फेटेधारी मानकरी, खेळाडू, ढोल ताशा आणि बँडच्या सोबत निघालेला शाही लवाजमा, करवीर निवासिनी श्री अंबाबाई, श्री तुळजाभवानीच्या पालख्यांचे आगमन झाले.

खासदार श्रीमंत शाहू महाराज यांनी परिवारासोबत शमी पूजन केले. पारंपरिक व मंगलमय वातावरणात शनिवारी (ता. १२) ऐतिहासिक दसरा चौकात शाही दसरा सीमोल्लंघन सोहळा पार पडला. पावसाने काही वेळ हजेरी लावूनही मोठ्या उत्साहाने जमलेल्या कोल्हापूरवासीयांच्या डोळ्यांचे पारणे फेडले. राज्य महोत्सवाचा दर्जा मिळालेल्या या दसरा सोहळ्याचा अनुभव घेण्यासाठी नागरिकांनी अलोट गर्दी केली होती.

शारदीय नवरात्र उत्सवाची सांगता विजयादशमीने होत असते. महाराष्ट्रातील साडेतीन शक्तिपीठांपैकी असलेल्या करवीर निवासिनी श्री अंबाबाईच्या विजयाचा हा सोहळा आणि संस्थानकालीन शाही दसरा सोहळा याची परंपरा आजही दिमाखात होत असतो. सायंकाळी पाच वाजता अंबाबाई मंदिरातून श्री अंबाबाईची पालखी तसेच भवानी मंडपातून तुळजाभवानी आणि गुरुमहाराज यांच्या पालख्या शाही लवाजम्यांनिशी मिरवणुकीने दसरा चौकात आल्या.

ॲग्रो विशेष

गेली दोन वर्षे या सोहळ्याची व्याप्ती वाढल्याने मिरवणुकीमध्ये संस्थान काळातील सैनिक वेशातील घोडेस्वार, पारंपरिक वेशभूषा व फेटे घातलेले मानकरी, खेळाडू, विविध तालमीचे पैलवान, मर्दानी खेळांची प्रात्यक्षिके, पारंपरिक वाद्यांचा गजर अशा सरंजाम होता.

न्यू पॅलेसमधून ऐतिहासिक मेबॅक कार मधून खासदार शाहू छत्रपती आणि त्यांच्यासोबत शाही परिवारातील सदस्यांचे आगमन झाले. प्रथम खासदार श्रीमंत शाहू छत्रपती महाराजांनी पोलिस बँडची मानवंदना स्वीकारली. कार्यक्रमास उपस्थित मान्यवरांना भेटून शुभेच्छाही दिल्या.

भालदारानी ललकारी दिल्यानंतर सहा वाजून अकरा मिनिटांच्या मुहूर्तावर छत्रपती परिवाराने लकडकोटामधील शमीचे पूजन केले. देवीची आरती झाल्यानंतर हवेत बंदुकीच्या फैरी झडल्या आणि उपस्थित करवीरवासीयांनी मैदानाकडे धाव घेतली आणि सोने लुटण्यासाठी अक्षरश झुंबड उडाली.