Agriculture Irrigation : गिरणा पट्ट्यातील अनेक प्रकल्पांचा रब्बीस लाभ

Jalgaon News : खानदेशात सर्वात मोठ्या गिरणा धरणातील जलपातळी यंदा १०० टक्के असून, यंदा धरणातून रब्बीसाठी पाणी मिळत आहे. दुसरीकडे अन्य मध्यम, लघू प्रकल्पदेखील भरले आहेत. यामुळे रब्बी गिरणा पट्ट्यात जोमात आहे.

गिरणा नदीवरील गिरणा धरण खानदेशातील सर्वात मोठे धरण आहे. गिरणा धरण भौगोलिकदृष्ट्या नाशिकमधील नांदगावात आहे. परंतु त्याचा सर्वाधिक लाभ जळगावातील चाळीसगाव, भडगाव, पाचोरा, एरंडोल, धरणगाव आदी भागास आहे.

नाशिकमधील मालेगाव शहर, नांदगाव शहर आणि मालेगावातील उद्योगांना या धरणातून पाणी दिले जाते. तसेच जळगावातील चाळीसगाव, पाचोरा, भडगाव शहरांसह १२० गावांच्या पाणी योजना गिरणा धरणावर अवलंबून आहेत. या धरणाची साठवण क्षमता १८ टीएमसी आहे.

कमी पावसामुळे मागील वेळेस हे धरण फक्त ५६ टक्के भरले होते. धरणात पुरेसा जलसाठा मागील वेळेस नसल्याने त्यातून रब्बीस पाणी मिळाले नव्हते. परंतु यंदा गिरणा धरण १०० टक्के भरले आहे. गिरणा पट्ट्यातील २१ हजार हेक्टरवर रब्बी हंगामास लाभ मिळत आहे. या धरणातून एक वेळेस नदीत आवर्तन सोडण्यात आले आहे. या धरणात जलसाठा मुबलक असल्याने पाणी योजनांनादेखील पाणी पुरेसे मिळत आहे.

गिरणा पट्ट्यात चाळीसगाव, भडगाव, पाचोरा, एरंडोल, धरणगाव, जळगाव आदी क्षेत्र आहे. या भागातील लहान-मोठे तलाव, मध्यम प्रकल्पही भरले आहेत. चाळीसगावातील मन्याड, पाचोऱ्यातील , अग्नावती, बहुळा, पारोळ्यातील भोकरबारी, बोरी, एरंडोलातील अंजनी आदी प्रकल्पांत जलसाठा मुबलक आहे. मन्याड प्रकल्प मागील वेळेस कोरडाठाक होता. तसेच पारोळ्यातील भोकरबारी, बोरी, म्हसवे लघु प्रकल्पातही जलसाठा कमी होता. बोरी प्रकल्पात बऱ्यापैकी जलसाठा असल्याने पारोळ्यातील मोठ्या क्षेत्रास लाभ होत आहे.