Self Employment : हस्तकलेच्या वस्तूंमधून स्वयंरोजगाराची संधी

Bordi News : हस्तकला प्रशिक्षण उपक्रमाला पहिल्या पर्वात महिलांचा भरघोस प्रतिसाद मिळाला आहे. हा उपक्रम फक्त घोलवड ग्रामपंचायतीपुरता मर्यादित न ठेवता परिसरातील आठ ग्रामपंचायतींतील महिलांना स्वयंरोजगाराची संधी उपलब्ध करून घरबसल्या रोजगार मिळवून देणे शक्य आहे, असा विश्वास घोलवडचे सरपंच रवींद्र बुजड यांनी व्यक्त केला.

महाराष्ट्र पर्यटन विकास महामंडळाने पालघर जिल्ह्यातील अमूर्त सांस्कृतिक वारसावर आधारित पर्यटनाला चालना देण्यासाठी नावीन्यपूर्ण उपक्रम सुरू केला आहे.

या उपक्रमाकरिता ‘एमटीडीसी’ने कॉन्टॅक्ट बेस या संस्थेला समुदाय आधारित पर्यटन मॉडेल डिझाइन आणि विकसित करण्यासाठी निवड केली आहे. २० वर्षांचा अनुभव असलेल्या या संस्थेमार्फत सांस्कृतिक विकास आणि सर्वसमावेशक पर्यटन या विषयावरील तज्ज्ञांमार्फत सामाजिक उपक्रम राबविण्यात आला आहे.

या उपक्रमाचा एक भाग म्हणून १७ दिवसांत तज्ज्ञ कारागीर सुमन दास, गौतम मोदक, तुलसीराम ठाकरे, रामदास कुपाने यांच्या मार्गदर्शनाखाली घोलवड गावातील सुमारे ३५ महिलांना बुरुड कामातून विविध हस्तकला वस्तू बनविण्याचे प्रशिक्षण देण्यात आले. या वस्तूंचे प्रदर्शन गावातील शाळेच्या सभागृहात भरविण्यात आले होते.