APMC Reform: बाजार समित्यांसाठी पुन्हा सचिव पॅनेल आणणार

Pune News: राज्यातील बाजार समित्यांमधील संचालक मंडळाच्या ताटाखालचे मांजर झालेल्या आणि वर्षानुवर्षे एकाच पदावर ठाण मांडून बसलेल्या सचिवांच्या आता राज्यात बदल्या होणार आहेत. यासाठीचा प्रस्ताव पणन विभागाने मुख्यमंत्र्यांना सादर केला असून, त्यासाठी सचिवांचे पॅनेल करण्यात येणार आहे. यासाठी मुख्यमंत्री देवेंद्र फडणीस सकारात्मक असल्याचे पणन मंत्रालयाकडून सांगण्यात आले.

राज्यातील बाजार समित्यांमधील सचिवांची नियुक्ती ही वर्षानुवर्षे संचालक मंडळ करत आली आहे. ही निवड करताना, संचालक मंडळाच्या गुडबुकमध्ये राहणाऱ्या अननुभवी कर्मचाऱ्याची नियुक्ती होत आली आहे. एकदा सचिव म्हणून नियुक्ती झाल्यावर सेवानिवृत्तीपर्यंत एकाच खुर्चीवर सचिव कार्यान्वित असतात.

या कार्यप्रणालीमध्ये सभापती, संचालक मंडळ आणि सचिव यांची युती होऊन, गैरव्यवहारांना खतपाणी घातले जात असल्याचे बहुतांश बाजार समित्यांचा अनुभव आहे. ही कार्यप्रणाली संपुष्टात आणून संचालक मंडळावर शासनाचा वचक राहण्यासाठी आणि बाजार समित्यांचा कारभार पारदर्शी राहण्यासाठी सचिव पॅनेल आणण्याच्या हालचाली पणन विभागात सुरू आहेत.

दरम्यान, महायुतीच्या कार्यकाळात २०१९ मध्ये सचिव पॅनेल नियुक्त केले होते. या पॅनेलला तत्कालीन काँग्रेस, राष्ट्रवादी काँग्रेसप्रणीत राज्य बाजार संघाने तीव्र विरोध केला होता. हा विरोध डावलून तत्कालीन मुख्यमंत्री फडणवीस यांनी सचिवांचे पॅनेल नियुक्त केले होते. मात्र महाविकास आघाडीचे सरकार आल्यावर ते पॅनेल रद्द करण्यात आले होते. आता पुन्हा सचिव पॅनेल येणार असल्याने बाजार समित्यांसह विद्यमान सचिवांचे धाबे दणाणले आहे.

बाजार समित्यांना मिळणार उच्चशिक्षित सचिव

शेतीमाल पणन क्षेत्र आता ग्लोबल होत आहे. यासाठी बाजार समित्या सक्षमीकरणावर राज्य सरकारने भर दिला आहे. यामुळे नवीन पणन धोरण आणि पणन क्षेत्राच्या बदलाला सामोरे जाताना, उच्चशिक्षित सचिवांची गरज भासणार आहे. यासाठी महाराष्ट्र राज्यसेवा आयोगाच्या निकषांनुसार सचिवांची नियुक्ती होणार आहे.