Pune Cluster School : पुणे जिल्ह्यातील वाडा येथे दुसरी समूह शाळा

Pune News: कमी पटसंख्या असलेल्या शाळांचे एकत्रीकरण करून, शिक्षक आणि विद्यार्थ्यांना दर्जेदार शिक्षण मिळावे, या उद्देशाने जिल्ह्यातील दुसरी समूह शाळा (क्लस्टर स्कूल) वाडा (ता. खेड) येथे साकारण्यात येणार आहे.

यासाठी शाळा व्यवस्थापन समितीने मान्यता दिली असून, आता जिल्हा परिषदेने समूह शाळेचा निर्णय घेतला आहे. यामुळे आता पानशेत नंतर वाड्याची दुसरी समूह शाळा होणार असल्याची माहिती जिल्हा परिषदेचे मुख्य कार्यकारी अधिकारी गजानन पाटील यांनी दिली.

श्री. पाटील म्हणाले, की सात वाड्यांमध्ये एकूण १२८ विद्यार्थी शिक्षण घेत आहेत. हे सर्व विद्यार्थी आता एकाच शाळेत शिक्षण घेतील. त्यामध्ये इयत्ता पहिली ते चौथीपर्यंतच्या वर्गांचा समावेश आहे. शाळा व्यवस्थापन समिती, पालक यांच्‍या सहकार्यातून जिल्हा परिषदेने समूह शाळा सुरू करण्यासाठी पुढाकार घेतला.

विद्यार्थ्यांच्‍या वाहतुकीसाठी स्कूल बस

वाडा गाव येथे सुरू करण्यात येत असलेल्‍या समूह शाळेमध्ये विद्यार्थ्यांची ने-आण करण्यासाठी वाहतुकीची व्‍यवस्‍था करण्यात आली आहे. जिल्हा परिषदेला एका कंपनीच्या औद्योगिक क्षेत्रातील सामाजिक जबाबदारीच्या (सीएसआर) माध्यमातून स्कूल बस उपलब्ध करून देण्यात आली आहे. त्यामुळे विद्यार्थ्यांना शाळेत पोहोचण्याची चिंता मिटली आहे.