Palghar ZP School : पालघर जिल्ह्यातील शाळांच्या इमारती धाेकादायक

Palghar News : ग्रामीण भागातील शाळा गुरुवारपासून (ता. १५) सुरू होत आहे. मुंबईपासून हाकेच्या अंतरावर असलेल्या पालघर जिल्हा परिषदेच्या शाळेतील विद्यार्थ्यांना यावर्षी जीव मुठीत घेऊन शिक्षण घ्यावे लागत आहे.

जिल्हा परिषद अंतर्गत शेकडो शाळांची दुरवस्था झाली असून दुरुस्तीकडे प्रशासन दुर्लक्ष करत असल्याचे चित्र आहे. डहाणूमधील ग्रामीण विद्यार्थी जीर्ण आणि पडझड झालेल्या शाळांमध्ये शिक्षणाचे धडे गिरवत आहेत.

दहिगाव येथील जिल्हा परिषद शाळेच्या इमारतीची दुरवस्था झाली आहे. इमारतीचे छप्पर, भिंती जीर्ण झाले असून पावसाळ्यात कोसळण्याची शक्यता वर्तवण्यात येत आहे. शाळा परिसरात संरक्षण भिंतीचे काम सुरू आहे.

मात्र इमारतीच्या दुरवस्थेकडे प्रशासनाचे दुर्लक्ष असल्याने पालकांकडून संताप व्यक्त करण्यात येत आहे. शिक्षण, पालघर जिल्ह्यात आजही शिक्षण, शिक्षण विभागाचा बोजवारा उडालेला पाहायला मिळत आहे.