Pune News : पुणे कृषी उत्पन्न बाजार समितीमध्ये पार्किंग टेंडरमध्ये मोठा घोटाळा झाल्याची तक्रार तीन संचालकांनी पणन संचालक आणि जिल्हा उपनिबंधकांकडे केली आहे. या तक्रारीनुसार बाजार समितीचे ३२ लाख रुपयांचे नुकसान होत आहे. याची चौकशी करण्याची मागणी संचालकांनी केली आहे.
तसेच, बाजार समितीने नियमबाह्य पद्धतीने दिलेले विविध ठेके आणि अनियमित ठेकेदारांचे पार्किंग ठेके तातडीने रद्द करून ई-निविदा प्रक्रिया राबविण्याची मागणी बाजार समितीचे संचालक सुदर्शन चौधरी, रवींद्र कंद आणि नानासाहेब आबनावे यांनी केली आहे.
बाजार समितीच्या मुख्य बाजार आवारातील जुन्या बटाटा शेडच्या शेजारील मोकळ्या जागेवर वाहनतळ चालविण्याच्या कामाचा ठेका ज्या कंपनीला दिला आहे, ते कंपनीचे ठेकेदार पार्किंग ठेक्याची रक्कम वेळेत भरत नाही.
तसेच हे ठेकेदार नेमून दिलेल्या पार्किंगच्या जागा सोडून इतर ठिकाणचे पार्किंगचे शुल्कदेखील जमा करीत आहेत. हा बाजार समितीसोबत केलेल्या करारनाम्यामधील अटी-शर्तींचा भंग आहे. त्यामुळे या कंपनीला देण्यात आलेला पार्किंगचा ठेका रद्द करून नव्याने ई-निविदा प्रक्रिया राबविण्यात यावी, अशी मागणी करण्यात आली आहे.
मुख्य बाजार आवारातील गेट क्र.१ च्या लगत वजनकाट्यामागील रिकाम्या जागेत (दुचाकी, मोटार कार) वाहनतळाचा ठेका बाजार समितीने ई-निविदा प्रक्रिया राबवून दिलेला होता. त्यावेळी वार्षिक ठेका ६२ लाख ७२ हजार रुपयांना दिला होता. या वाहनतळामधून बाजार समितीला १० महिन्यांमध्ये केवळ ३० लाख ५६ हजार ७५० रुपयांचे उत्पन्न मिळाले आहे.
या कालावधीमध्ये कर्मचाऱ्यांवर १६ लाख ४ हजार रुपये खर्च झाला आहे. मागील ई-निविदेनुसार या वाहनतळामध्ये १० महिन्यांत बाजार समितीला ५२ लाख २६ हजार रुपयांचे उत्पन्न मिळाले असते. तसे न होता मागील दहा महिन्यांत ३७ लाख ७४ हजार रुपयांचे आर्थिक नुकसान झालेले आहे. त्यामुळे ई-निविदा प्रक्रिया राबविण्यात यावी, अशी मागणी केली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.