Tukaram Beej : तुकाराम बीज सोहळ्यासाठी देहूनगरी सज्ज

Pune News : जगद्‍गुरू संत श्री तुकाराम महाराज यांचा त्रिशतकोत्तर अमृतमहोत्सवी बीज सोहळा आज (ता.१६) होत आहे. या सोहळ्यात सहभागी होण्यासाठी राज्यभरामधून लाखो भाविक देहूत दाखल झाले आहेत. टाळ-मृदंग आणि विठुनामाच्या नामघोषाने देहूनगरी दुमदुमली आहे. बीज सोहळ्याच्या कार्यक्रमाला आज पहाटे सुरुवात होत आहे.

देहूतील इंद्रायणी नदीचा काठ भाविकांनी फुलून गेला आहे. तर, देहूतील शेत-शिवारात राहुट्या उभारून भाविक कीर्तन, प्रवचन ऐकण्यात तल्लीन झाले आहेत. टाळ-मृदंग आणि विठुनामाने भक्तिमय वातावरण निर्माण झाले आहे. देहूत येणाऱ्या चारही दिशांना बॅरिकेडिंग करण्यात आले असून, गावाच्या मुख्य प्रवेशद्वारातून आत येणारी वाहतूक पूर्णपणे बंद केली आहे.

संत तुकाराम महाराज संस्थानने देऊळवाड्यात जय्यत तयारी केली आहे. मुख्य देऊळवाडा आणि वैकुंठस्थान येथील मंदिराची विद्युत रोषणाई, रंगरंगोटी करण्यात आली आहे. देऊळवाड्यात आकर्षक फुलांची सजावट केली आहे. जादा स्वच्छता कर्मचारी नेमून मंदिर परिसरात स्वच्छता करण्यात आली आहे. मुख्य देऊळवाड्यात सोळा कॅमेरे बसविण्यात आले असून, वैकुंठस्थान मंदिर परिसरात चार कॅमेरे बसविले आहे.

देहू नगरपंचायतीच्या वतीने गावातील स्वच्छतेची कामे करण्यात येत आहेत. तसेच इंद्रायणी नदीच्या घाट परिसराची स्वच्छता करण्यात आली आहे. माळवाडी, देहू, विठ्ठलवाडी आणि गाथा मंदिर परिसरात औषध फवारणी करण्यात आली आहे. भाविकांना पिण्याचे पाणी उपलब्ध व्हावे यासाठी टॅंकर उपलब्ध करून देण्यात आले आहेत. तसेच पिंपरी-चिंचवड अप्पर तहसील कार्यालयाकडून पिण्याच्या पाण्याचे टॅंकर पाठविण्यात आलेले आहेत. विविध भागांतील चौकात नगरपंचायतीने फिरती स्वच्छतागृहे उपलब्ध केली आहेत.

सर्व चोख व्यवस्था

प्राथमिक आरोग्य केंद्राच्या वतीने तीन ठिकाणी बाह्यरुग्ण विभाग सुरू करण्यात आले असून, चार रुग्णवाहिका रुग्णांच्या सेवेसाठी उपलब्ध आहेत. महावितरण कंपनीचे यात्रा काळात वीजपुरवठा खंडित होऊ नये यासाठी खास व्यवस्था केली आहे. भाविकांच्या प्रवासासाठी पीएमपीएलच्या वतीने गावाबाहेर बसथांबा करण्यात आला असून जादा बसेस सोडण्यात येत आहेत. स्वारगेट, पुणे स्थानकांतून बसेस उपलब्ध आहेत. भाविकांच्या सुरक्षिततेसाठी चोख पोलिस बंदोबस्त ठेवण्यात आला असून, देहूनगरीला छावणीचे स्वरूप प्राप्त झाले आहे.