Sangli ZP: सांगली जिल्हा परिषदेचे ४४ कोटींचे अंदाजपत्रक

Sangli News: सांगली जिल्हा परिषदेचा सन २०२४-२५चे १३८ कोटींचे अंतिम सुधारित व २०२५-२६ या आर्थिक वर्षाचे ४४ कोटी ६९ रुपयांचे मूळ अंदाजपत्रक मुख्य कार्यकारी अधिकारी तथा प्रशासक तृप्ती धोडमिसे यांनी सोमवारी (ता. २४) सादर केले. गत वर्षीच्या तुलनेत यंदाच्या अंदाजपत्रकात ६ कोटींची घट झाली आहे. मुद्रांक शुल्कची रक्कम शासनाकडून न आल्याने ही घट झाल्याचे सांगण्यात आले.

जिल्हा परिषदेत प्रशासक आल्यापासून गेली तीन वर्षे मुख्य कार्यकारी अधिकारी तथा प्रशासकच अंदाजपत्रक सादर करत आहेत. गत वर्षी ५० कोटी २९ लाख २७ हजार ८८६ रुपयांचे अंदाजपत्रक सादर करण्यात आले होते. यंदाही सीईओ धोडमिसे यांनी अंदाजपत्रक सादर केले.

यावेळी मुख्य लेखा व वित्त अधिकारी विठ्ठल चव्हाण उपस्थित होते. यंदा शासनाकडून जिल्हा परिषदेला मुद्रांक शुल्क, स्थानिक उपकर, सापेक्ष अनुदान, जमीन महसूल अनुदान, प्रोत्साहन अनुदान प्राप्त झाले नाही. तसेच जिल्हा परिषदेचे विविध कराचे सुमारे ५६ कोटी ९५ लाख रुपये थकीत शासनाकडेच थकीत आहेत.

त्यामुळे या वर्षीच्या अंदाजपत्रकात ६ कोटींची तरदूद कमी करण्यात आली आहे. थकीत रक्कम मिळाल्यानंतर प्रथम सुधारित अर्थसंकल्पात विकास कामांच्या तरतुदी वाढविण्यात येणार असल्याचे सांगण्यात आले. मूळ अंदाजपत्रकात अध्यक्ष, उपाध्यक्ष यांचे मानधन, प्रवास भत्ता आणि आनुषंगिक खर्चासाठी सुमारे दोन कोटी रुपयांची तरतूद केली आहे.

विभागनिहाय तरतूद (रुपये)

ग्रामपंचायत ५ कोटी ४८ लाख

कृषी ६४ लाख

शिक्षण १ कोटी ५३ लाख

पशुसंवर्धन ६४ लाख

बांधकाम ४ कोटी ६७ लाख

आरोग्य १ कोटी ६७ लाख

लहान पाटबंधारे २१ लाख

दिव्यांग कल्याण ९३ लाख

पाणी पुरवठा ९५ लाख

समाज कल्याण १ कोटी २२ लाख

महिला व बालकल्याण ६३ लाख

सामान्य प्रशासन विभाग ३ कोटी २८ लाख

नवीन योजनांसाठी तरतूद

कृषी क्षेत्रात एआयचा वापरासाठी प्रोत्साहन ५ लाख

शेतीसाठी ड्रोनचा वापर, प्रशिक्षण ३० लाख

सेंद्रिय शेती विकासाठी प्रकल्प राबविणे ५ लाख

पीक उत्पादन वाढ प्रशिक्षण, परिसंवाद ३ लाख

ऑनलाइन वेबसाइट, पोर्टलवर तंत्रज्ञाचा वापर ३ लाख