Cotton Import Duty: कापूस आयातीवरील ११% शुल्क रद्द करा; ‘सीओसीपीसी’ची केंद्राला शिफारस

Pune News: अमेरिकेच्या कापसासाठी देशातील बाजारपेठेची दारे सरसकट खुली करण्याची मागणी देशातील उद्योग करत आहेत. कापूस उत्पादन आणि वापर समितीनेही कापसावरील ११ टक्के आयात शुल्क कमी करण्याची शिफारस केली आहे. कापसावरील आयात शुल्क शून्य करून अमेरिकेला खुश करता येईल, असेही या समितीचे म्हणणे आहे.

कापूस उत्पादन आणि वापर समितीची अर्थात ‘सीओसीपीसी’ची बुधवारी (ता. १६) मुंबईत बैठक झाली. वस्त्रोद्योग सचिवांच्या अध्यक्षतेखाली झालेल्या बैठकीत सरकारला काही शिफारशी करण्यात आल्या. सीओसीपीसीच्या सदस्यांमध्ये कापूस उद्योगातील सर्व भागीदारांचा समावेश आहे.

देशातील कापूस उत्पादनात यंदा मोठी घट झाली. कापूस वापरापेक्षा यंदा उत्पादन कमी आहे. उत्पादन कमी राहिले तरी शेतकऱ्यांना कापसासाठी योग्य दर मिळाला नाही. कमी दर मिळाल्याने शेतकरी आडचणीत आले आहेत. परंतु आंतरराष्ट्रीय बाजारात कापसाचा भाव कमी असल्याने हा कापूस देशात आयात करावा, यासाठी उद्योग प्रयत्न करत आहेत.

आंतरराष्ट्रीय बाजारात कापूस स्वस्त आहे. देशात कापसाचे भाव जास्त आहेत. त्यामुळे देशातील उद्योगांचा खर्च वाढत आहे. परिणामी सूत आणि कापड निर्यातीमध्ये अडचणी येत आहेत, असे कापड उद्योग म्हणणे आहे.

आंतरराष्ट्रीय बाजारातील स्वस्त कापूस देशात यावा यासाठी उद्योग प्रयत्न करत आहेत. मागील महिन्यातच उद्योगांनी अमेरिकेच्या १५ ते २० लाख गाठी कापसाची शुल्कमुक्त आयात करावी, अशी मागणी केली होती. आता सीओसीपीसीने सरकारला ११ टक्के आयात शुल्क काढण्याची मागणी केली. सरकार सरसकट आयात शुल्क काढू शकत नसेल तर सरकारने एक महिन्यासाठी आयात शुल्काला स्थगिती द्यावी, अशीही शिफारस सीओसीपीसीने केली आहे.

अमेरिकेला खुश करण्याचा प्रयत्न

अमेरिकेच्या कापसाला भारताने बाजारपेठ खुली करून द्यावी, अशी मागणी अमेरिका भारताकडे करत आहे. केंद्राने कापूस आयातीवर ११ टक्के शुल्क आधीच लावलेले आहे. अमेरिका हे शुल्क काढण्याची मागणी करत आहे. आता देशातील उद्योगही केंद्राने आयात शुल्क काढण्याची मागणी करत आहेत. अमेरिकेने भारताच्या आयातीवर शुल्क लावले आहे. भारताने कापसावरील आयात शुल्क काढल्यास अमेरिकेला सकारात्मक संदेश जाईल, असेही उद्योगांचे म्हणणे आहे.