Agriculture Irrigation : दुबार पिके घेण्यासाठी ‘भातसा’तून पाणी सोडा

Mumbai News : शहापूर तालुक्यातील भातशेती, भाजीपाल्यांच्या रब्बी व हंगामी लागवडीसाठी भातसा उजवा कालव्याद्वारे सोडण्यात येणारे पाणी डिसेंबर महिना सुरू होऊनही न सोडल्याने शेतकरी हवालदिल झाले आहेत.

कालव्यालगत शेती असलेले शेतकरी भातशेतीबरोबरच इतर भाजीपाला लागवड करून उत्पादन घेत असतात. त्यामुळे कालव्याचे पाणी लवकरात लवकर सोडण्यात यावे, अशी मागणी शेतकरी करीत आहेत.

भातसा उजवा कालवा (तीर) हा ५४ किलोमीटर लांबीचा आहे. या कालव्याचा शहापूर, भिवंडी तालुक्यातील जवळपास ५० गावांना लाभ होत असून त्यामुळे जवळपास एक हजार ६१३ हेक्टर क्षेत्र सिंचनाखाली येणार आहे.

भातसा कालव्यालगतच्या गाव-पाड्यातील ग्रामस्थांचा पिण्याच्या पाण्याचा प्रश्‍नही सुटणार आहे. भातसा कालव्यालगत सरळाबे, खरिवली, आवरे-कांबारे, चेरपोली, शहापूर, सावरोली आसनगाव, वासिंद, दहागाव येथील रहिवाशांना पाण्यासाठी संघर्ष करावा लागत आहे.