Ravikant Tupkar : 'स्वाभिमानी'मधील नाराज रविकांत तुपकरांना भाजपची ऑफर

Swabhimani Shetkari Sanghtana : गेल्या काही महिन्यांपासून स्वाभिमानी शेतकरी संघटनेत सुरू असलेली अंतर्गत धुसफूस आता उघड रित्या समोर आली आहे. बुलढाण्यात रविकांत तुपकर यांनी बुधवारी (ता. २) आपल्या समर्थकांची बैठक घेत नाव न घेता माजी खा. राजू शेट्टींवर टीका केली होती. दरम्यान, आज त्यांना माजी आमदार आशिष देशमुखांनी भाजपमध्ये येण्याची ऑफर दिली.

स्वाभिमानी शेतकरी संघटनेत माजी खासदार राजू शेट्टी यांच्या नेतृत्वाखाली गेल्या अनेक वर्षांपासून रविकांत तुपकर काम करीत आहेत. त्यांनी बुलढाण्यातून २०१९ च्या लोकसभा निवडणूक लढवण्यासाठी तयारीही केली होती. त्याचवेळी त्यांनी रयत क्रांती संघटनेत प्रवेश केला होता. काही महिन्यात त्यांनी घरवापसी केली. पण राजू शेट्टी आणि तुपकर यांच्यातील संबंध पुर्वीसारखे राहिले नाहीत.

मागील काही महिन्यांपासून तर दोन्ही नेत्यांमध्ये अबोला आहे. राजू शेट्टी यांनी बुलढाणा जिल्ह्यात तीन दौरे केले. या दौऱ्यात तुपकर दिसले नाहीत. त्यांची गैरहजरीवरून ते नाराज असल्याचे सर्वत्र चर्चा सुरू झाली. दरम्यान, बुधवारी तुपकरांनी आपल्या समर्थकांची बैठक घेऊन संघटनेतील अंतर्गत राजकारणाचा समाचार घेतला. यावेळी त्यांनी नाव न घेता ‘स्वाभिमानी’मधील काही वरिष्ठांवर थेट नाराजीचा सूर व्यक्त केला. त्यांच्या बोलण्याचा रोख स्पष्ट होता. राज्याच्या कानाकोपऱ्यात फिरून संघटना उभी करणार असल्याचेही त्यांनी समर्थकांसमोर जाहीर केले.

तुपकरांच्या नाराजीनंतर भाजपच्या राज्य ओबीसीचे सेलचे समन्वयक आशिष देशमुख यांनी थेट भाजप प्रवेशाची खुली ऑफर दिली आहे. त्यांनी सांगितले की, “स्वाभिमानी शेतकरी संघटनेमध्ये एक खदखद पाहायला मिळत आहे. वर्षानूवर्षे शेतकऱ्यांसाठी झटत असलेल्या प्रामाणिक नेते आणि कार्यकर्त्यांचा स्वाभिमान दुखावला जात आहे. सदाभाऊ खोत यांच्या माध्यमातून पाहिलं आहे. रविकांत तुपकर यांनी आपली नाराजी पक्षाच्या नेतृत्वावर बोलून दाखवली आहे. त्यामुळे भाजपात प्रवेशासाठी खुली ऑफर रविकांत तुपकर यांना आहे. त्यांच्या येण्याने भाजपा मजबूत होईल,” असं देशमुख यांनी म्हटले आहे.

त्यामुळे बुलढाणा लोकसभा निवडणूक लढवू इच्छिणारे रविकांत तुपकर भाजप का बीआरएस यापैकी कोणत्या पक्षात ते जाणार हे येणाऱ्या काळात स्पष्ट होईल.