Farmer Protest : नेवासा फाटा येथे शेतकरी संघटनेचे ‘रास्ता रोको’

Nagar News : गळीत हंगाम सुरू करून अनेक दिवस झाले, तरी जिल्ह्यातील साखर कारखान्यांनी ऊसदर जाहीर केलेला नाही. कारखान्यांनी ऊस उत्पादक शेतकऱ्यांसाठी उसाचे दर जाहीर करावेत,

तसेच केंद्र सरकारने उसाच्या रसापासून इथेनॉल निर्मितीवर बंदी आणल्याच्या निषेधार्थ नेवासे तालुका शेतकरी संघटनेच्या वतीने शनिवारी (ता. ९) नगर - छत्रपती संभाजीनगर महामार्गावर नेवासे फाटा येथे रास्ता रोको आंदोलन केले.

जिल्ह्यात गेल्या अनेक दिवसांपासून साखर कारखान्याचा गाळप हंगाम सुरू झाला आहे. मात्र अजूनही साखर कारखान्यांनी उसाचा दर जाहीर केला नाही. साखर कारखानदार ऊस उत्पादक शेतकऱ्यांची पिळवणूक करत आहेत.

तसेच रसापासून इथेलॉन निर्मिती करण्यास केंद्र सरकारने बंदी घातली, तसेच कांदा पीक निर्यात बंदी केली. त्यामुळे केंद्र व राज्य सरकारच्या विरोधात शेतकरी संघटनेचे जिल्हाध्यक्ष अनिल औताडे यांच्यासह शेतकरी संघटनेच्या कार्यकर्त्यांनी नगर - छत्रपती संभाजीनगर महामार्गावर नेवासे फाटा येथे रास्ता रोको आंदोलन केले. इतर संघटना व पक्षांचे नेतेही यात सहभागी झाले होते.