Water Crisis : राज्यात जलसंकंट गडद; प्रमुख धरणांमध्ये राहिला फक्त ३१.३९ टक्के उपयुक्त पाणीसाठा

Pune News : गेल्या वर्षा कमी पडलेल्या पावसामुळे या वर्षी राज्यातील अनेक धरणातील पाणीसाठ्यात मोठी घट झाली आहे. अनेक धरणातील पाणी फक्त पिण्यासाठी आरक्षित करण्यात आल्याने पीक करपले आहे. यादरम्यान राज्यातील सर्व २९९४ धरणातील पाणीसाठ्यात झापट्याने घट होत आहे. जलसंपदा विभागाच्या माहितीनुसार गुरूवारी (ता. १८) राज्यातील सर्व २९९४ धरणातील पाणीसाठ्या गेल्या वर्षी पेक्षा ८.४१ टक्क्यांची घट झाली आहे. सध्या या सर्व धरणांमध्ये ३२.३६ टक्के उपयुक्त पाणीसाठा आहे. तर सर्वात कमी पाणीसाठा छ. सभाजी नगर विभागात असून येथे फक्त १५.८८ टक्केच पाणी शिल्लक आहे.

राज्यातील विविध जिल्ह्यांमध्ये वाढत्या उन्हाबरोबर पाणी आणि चाराटंचाईच्या झळा वाढल्या आहेत. अनेक धरणातील पाणीसाठ्यावर याचा परिणाम होत असून राज्यातील प्रमुख १३८ मोठ्या धरणांमध्ये सध्या ३१.३९ टक्के पाणीासाठा राहिला आहे. मध्यम प्रकल्पांचा विचार केल्यास तो ३९.१७ टक्के आणि २५९६ लहू प्रकल्पांमध्ये आज ३०.७८ टक्के पाणी शिल्लक आहे.

शून्य टक्के पाणीसाठा

अनेक धरणातील पाणी सध्या आटत असून पाणी तळ गाठत आहे. गोंदिया जिल्ह्यातील कालीसरार, बुलढाण्यातील खडकपूर्णा, बीडमधील माजलगावसह तीन धरणे, उस्मानाबादमधील सिना कोळेगाव, नाशिकमधील पुणेगाव, पुण्यातील लोणावळा टाटा आणि सोलापुरमधील भीमा उजनी धरणात शून्य टक्के पाणीसाठा आहे. तर लातूर मधील सर्व ९ धरणांची वाटचाल शून्य टक्के पाणीसाठ्याकडे सध्या सुरू आहे.

धरणातील पाणीसाठा कमी झाल्याने राज्यातील सहा विभागातील १,८३४ गावे आणि ४,४३४ वाड्यांवर २३२० टँकरद्वारे पाणीपुरवठा केला जात आहे. यात सर्वाधिक टँकर मराठवाड्यातील छ. संभाजीनगरमध्ये फिरत असून येथे ५२७ टँकर जिल्हाभर फिरत आहेत. छ. संभाजीनगरमधील ३४५ गावांसह ५१ वाड्यावस्त्यांमध्ये सध्या तीव्र पाणी टंचाई आहे. याखालोखाल जालन्यात ३५८ टँकरने पाणीपुरवठा सुरू असून बीडमध्ये १९९ टँकरने दररोज १६२ गावे आणि १२६ वाड्यांना पाणी पुरवणे सुरू आहे.

एकीकडे राज्यातील अनेक जिल्ह्यात सध्या तीव्र पाणीबाणी दिसत असून नागरीक हैराण झाले आहेत. टँकरने पाणीपुरवठा वाढवावे अशी मागणी वाढत आहे. मात्र निवडणुकांच्या रणधुमाळीत राज्यकर्त्यांसह प्रशासनाचे इकडे दुर्लक्ष होत आहे.