Rain Update : कोकणात पुन्हा वाढला पावसाचा जोर

Pune News : कोकणात पुन्हा पावसाचा जोर वाढण्यास सुरवात झाली आहे. रायगड, रत्नागिरी, सिंधुदुर्ग जिल्ह्यात अनेक ठिकाणी मुसळधार पाऊस पडला. गुरुवारी (ता.२८) सकाळी आठ वाजेपर्यंत सिंधुदूर्गमधील वेंगुर्ला येथे १०८.७ मिलिमीटर पाऊस झाला. मध्य महाराष्ट्र, मराठवाडा व विदर्भात काही ठिकाणी हलका पाऊस पडला. यामुळे कोकणात शेतीच्या कामांना वेग आला आहे.

कोकणात सिंधुदुर्गनगरी जिल्ह्यात मुसळधार पाऊस सुरू आहे. वेंगुर्ल्याला पावसाने अक्षरशः झोडपून काढले. तर सावंतवाडी, कणकवली आणि दोडामार्गात मुसळधार पाऊस झाला. याशिवाय रायगड, रत्नागिरी, ठाणे, पालघर जिल्ह्यांत देखील पावसाचा जोर वाढल्यामुळे भातरोपांच्या पुनर्लागवडीला वेग आला आहे.

खानदेशात अधूनमधून ढगाळ वातावरण तयार होत आहे. मात्र, काही प्रमाणात ऊन पडत असल्याने पिके सुकत आहेत. शेतकरी अजूनही जोरदार पावसाच्या प्रतिक्षेत आहेत. पश्‍चिम महाराष्ट्रात साताऱ्यातील महाबळेश्वर येथे २१.८ मिलिमीटर पाऊस पडला. तर कोल्हापुरातील बावडा येथे ३२.९, भुदरगड १७.८, चंदगड १८.५ मिलिमीटर पाऊस पडला. नाशिक, नगर, पुणे, सातारा, सोलापूर, सांगली भागांत अधूनमधून सरी आल्या.

मराठवाड्यात पावसाने चांगलीच उघडीप दिली आहे. त्यामुळे शेतात मजूरांसह शेतकरी कामे करताना दिसत आहेत. मराठवाड्यातील बदनापूर येथे ११.३ मिलिमीटर, तर भोकर येथे १९.५, हिमायतनगर १७.६, पाथरी १८.९, जिंतूर १५.९, सेनगाव ११.९ मिलिमीटर पाऊस पडला.

तर विदर्भातील अमरावतीतील धामणगाव रेल्वे येथे ४२.६ मिलिमीटर पाऊस पडला. तर यवतमाळमधील कळंब येथे ४१.६ मिलिमीटर पाऊस पडला. देवळी ३८.१, नरखेड ३८.५, हिंगणघाट येथे २७.३ मिलिमीटर पाऊस पडला. पावसामुळे कापूस, सोयाबीन, मूग, उडीद पिकांना काहीसा दिलासा मिळाला.

गुरुवारी (ता.२५) सकाळी आठ वाजेपर्यंत सर्वाधिक पाऊस पडलेली ठिकाणे :

कोकण : अलिबाग ५३.६, सुधागड ५९.७, पेण ५२.९, महाड ७३.४, रोहा ८७.६, मुरूड ८९.६, श्रीवर्धन ५३.२, म्हसळा ५१.४, तला ७२.८, चिपळून ६३.०, दापोली ८२.३, खेड ७२.८, गुहागर ९८.३, मंडणगड ५५.५, रत्नागिरी ७९.३, संगमेश्वर ५१.३, राजापूर ७०.३, देवगड ५३.२, मालवण ७५.१, सावंतवाडी ८६.०, कणकवली ६८.२, कुडाळ ८२.७, वैभववाडी ५७.६, दोडामार्ग ६९.३.