Crop In Crisis : पावसाने पाठ फिरवल्याने पिके धोक्यात

Akkalkot News : परिसरात खरीप हंगाम पावसाने पाठ फिरविल्याने पिके धोक्यात आली आहेत. नागणसूर, तोळणूर, हैद्रा, मराठवाडी, गुरववाडी, नाविंदगी, गौडगाव, कडबगाव, जेऊर, बोरोटी, कलप्पावाडी, सातनदुधनी आदी भागात खरीप हंगामातील पिके धोक्यात आली आहेत.

मे महिन्याच्या सुरुवातीला चांगला पाऊस झाल्याने या भागात तूर, सोयाबीन, मूग, बाजरी, मका ही सर्व पिके जोमात आली. परंतु जून व जुलैमध्ये पावसाने पाठ फिरवल्याने पिके धोक्यात आली आहेत.

या भागातील सर्व शेतकरी पावसाच्या प्रतीक्षेत असून, या भागात गेल्या दीड दोन महिन्यांपासून एकदाही मोठा पाऊस झालेला नाही. आतापर्यंत पावसाळा सुरू होऊन दोन महिने झाले तरी या भागात अद्यापपर्यंत वीस मिलीमीटरपेक्षा जास्त पाऊस झालेला नाही.

नागणसूर मंडलात आतापर्यंत सर्वात कमी पाऊस नोंदला गेला आहे. त्यामुळे या भागात खरिपाची पिकांची वाढ खुंटल्यामुळे पिके हाताला लागतील की नाही अशी शक्यता आहे. या भागातील पिण्याचा पाण्याचा प्रश्न देखील गंभीर होण्याची शक्यता आहे.

यावर्षी पीकविम्याची रक्कम वाढल्यामुळे शेतकऱ्यांना त्याचा फटका बसलेला आहे. एकीकडे पाऊस नाही तर दुसरीकडे विमा रक्कम वाढल्याने शेतकरी दुहेरी संकटात सापडला आहे.