Crop In Crisis : नांदेडला पावसाअभावी पिकांची वाढ खुंटली

Nanded News : जिल्ह्यात जुलै महिना अर्धा संपूनही पावसाने दमदार हजेरी लावली नाही. परिणामी, खरिपातील सोयाबीन, कपाशी, तूर, उडीद, मूग, ज्वारी या पिकांची वाढ खुंटली आहे. जिल्ह्यात १७ जुलैपर्यंत २८९.४० मिलिमीटर पाऊस पडणे अपेक्षित असताना आजपर्यंत १२४.४० मिलिमीटर पाऊस झाला आहे. यामुळे तब्बल ७५.२० मिलिमीटर पावसाची तूट निर्माण झाली आहे.

जिल्ह्यात जून ते ऑक्टोबर या पावसाळ्याच्या पाच महिन्यात सरासरी ८९१.० मिलिमीटर पाऊस पडतो. यंदा मान्सूनपूर्व तसेच मॉन्सूनचे आगमन झाल्यानंतर पावसाचे दमदार आगमन झाले नाही. जिल्ह्यात आजपर्यंत सरासरी २१४.२० मिलिमीटरानुसार वार्षिक सरासरीच्या केवळ २४.०३ टक्के पावसाची नोंद झाली आहे. हा पाऊसही ठराविक भागातच झाला आहे.

दरम्यान शेतकऱ्यांनी जूनमध्ये झालेल्या पावसानंतर पेरण्याची कामे आटोपून घेतली. यंदाही सर्वाधिक क्षेत्रावर सोयाबीनची पेरणी झाली आहे. यासोबतच कपाशी व हळदीचा पेरही यंदा वाढला आहे. या पिकांना पेरणी करून सध्या एक ते दीड महिन्याचा कालावधी होत आहे. परंतु नांदेड जिल्ह्यात मागील दहा-पंधरा दिवसांपासून पावसाने उघडीप दिली आहे.

परिणामी खरिपातील सोयाबीन, कपाशी, तूर, उडीद, मूग, ज्वारी या पिकांची वाढ खुंटली आहे. अनेक भागात सोयाबीन पिकांवर किडींचा प्रादुर्भावही झाला आहे. पावसाचे प्रमाण कमी असल्यामुळे सोयाबीनला मर लागली आहे. जिल्ह्यात जून ते आक्टोबर या पाच महिन्याच्या कालावधीत सरासरी ८९१.३० मिलिमीटर पाऊस पडतो.

तर ता. १७ जुलैपर्यंत २८९.४० मिलिमीटर पाऊस पडणे अपेक्षीत होते. असे असताना आजपर्यंत १२४.४० मिलिमीटर पाऊस झाला आहे. यामुळे जिल्ह्यात तब्बल ७५.२० मिलिमीटर पावसाची तूट निर्माण झाली आहे. पावसाने हुलकावणी दिल्यामुळे कमी कालावधीची मूग, उडीद यांसारख्या पिकांचे उत्पादन घटण्याची शक्यता शेतकरी व्यक्त करीत आहेत.

दरम्यान भारतीय हवामान विभागाने नांदेड जिल्ह्यात ता. १७, १८ व १९ जुलै या कालावधीत यलो अलर्ट जारी केला आहे. परंतु जिल्ह्यात मात्र ढगाळ वातावरण असलेतरी पावसाने मात्र अद्याप सुरुवात केली नाही. यामुळे शेतकऱ्यांना चिंता लागली आहे.