Kharif Crop : सोलापूर जिल्ह्यात खरीप पिके पावसाने तरली

Solapur News : जिल्ह्यात यंदा हंगामाच्या सुरुवातीला पावसाने चांगली सुरुवात केली. पण गेल्या दीड महिन्यापासून प्रदीर्घ विश्रांती घेतलेल्या पावसाने मागच्या दोन दिवसांत सर्वदूर हजेरी लावल्याने शेवटच्या घटका मोजणारी खरीप पिके तरली आहेत. विशेषतः माळशिरस, करमाळा, सांगोला तालुक्यांत सोयाबीन, बाजरी, तूर, मका यांसारखी पिके वाळत चालली होती, पण त्याची चिंता आता मिटली आहे.

जिल्ह्यात मागच्या काही वर्षांपासून खरिपाचे क्षेत्र वाढते आहे. या हंगामात सोयाबीन, तूर, बाजरी, उडीद, मूग, मका ही पिके घेतली जातात. जिल्ह्याची पावसाची वार्षिक सरासरी ५४५ मिलिमीटर आहे. त्यापैकी आतापर्यंत सरासरी ४०० मिलिमीटरपर्यंत झाला आहे. पण तो सरसकट झाला नाही. जिल्ह्याचे खरिपाचे क्षेत्र ३ लाख ३७ हजार ९६८ हेक्टर इतके आहे.

पण यंदा सर्वाधिक १२३ टक्के क्षेत्रावर ४ लाख १७ हजार २१ हेक्टर क्षेत्रावर पेरणी झाली आहे. हंगामाच्या सुरुवातीला मे महिन्यामध्ये जोरदार पाऊस झाला. त्यामुळे जिल्ह्यात सगळीकडे आशादायक चित्र होते. खरिपाच्या पेरण्यांनाही अगदी वेळेवर सुरुवात झाली. पण गेल्या दीड महिन्यापासून मात्र पावसाने प्रदीर्घ विश्रांती घेतली.

परिणामी बार्शी, मोहोळ, माळशिरस, दक्षिण सोलापूर आणि अकलूज, माळशिरस, करमाळा आणि सांगोला या तालुक्यांमध्ये पावसाची टंचाई सुरू झाली. पिके ताणावर गेली, विशेषतः जिथे पाणीसाठ्यांवर आधारित सिंचनाची सोय नाही, त्या ठिकाणी पिकांचे मोठ्या प्रमाणावर नुकसान होत होते. गेल्या काही दिवसांत तर या भागातील पिके पुरती कोमेजून गेली. पण मागच्या दोन दिवसांत पडलेल्या पावसामुळे मात्र मोठा दिलासा या पिकांना मिळाला आणि ती चांगलीच तरली.